kab se is duniya ko sargarm-e-safar pata hun main

kab se is duniyā ko sargarm-e-safar paatā huuñ maiñ

phir bhī har manzil ko pahlī rahguzar paatā huuñ maiñ

murshid-e-mai-ḳhāne ke qadmoñ pe sar paatā huuñ maiñ

ab dimāġh-e-mai-parastī arsh par paatā huuñ maiñ

har taraf saaqī tirā faiz-e-nazar paatā huuñ maiñ

ḳhānqāhoñ meñ bhī mastī kā asar paatā huuñ maiñ

dam-ba-dam us ruḳh pe ik husn-e-digar paatā huuñ maiñ

har nigāh-e-shauq ko pahlī nazar paatā huuñ maiñ

sajda us kā hai jabīñ us kī hai qismat us kī hai

jis kī peshānī pe un kī ḳhāk-e-dar paatā huuñ maiñ

allāh allāh sākinān-e-kū-e-jānāñ kā vaqār

har gadā-e-āstāñ ko tājvar paatā huuñ maiñ

arsh ko hairat haram ko vajd nāzāñ bandagī

haa.e vo aalam ki jab sajde meñ sar paatā huuñ maiñ

le ga.e kis ke ruḳh o gesū bahār-e-roz-o-shab

muddatoñ se ghar ko be-shām-o-sahar paatā huuñ maiñ

duur hotī hai rah-e-ġhurbat meñ kosoñ kī thakan

jab kisī manzil pe koī ham-safar paatā huuñ maiñ

ahl-e-mahfil hoñge kyā ahl-e-basīrat ai 'shafīq'

mīr-e-mahfil hī ko be-fikr-o-nazar paatā huuñ maiñ

kab se is duniya ko sargarm-e-safar pata hun main

phir bhi har manzil ko pahli rahguzar pata hun main

murshid-e-mai-KHane ke qadmon pe sar pata hun main

ab dimagh-e-mai-parasti arsh par pata hun main

har taraf saqi tera faiz-e-nazar pata hun main

KHanqahon mein bhi masti ka asar pata hun main

dam-ba-dam us ruKH pe ek husn-e-digar pata hun main

har nigah-e-shauq ko pahli nazar pata hun main

sajda us ka hai jabin us ki hai qismat us ki hai

jis ki peshani pe un ki KHak-e-dar pata hun main

allah allah sakinan-e-ku-e-jaanan ka waqar

har gada-e-astan ko tajwar pata hun main

arsh ko hairat haram ko wajd nazan bandagi

hae wo aalam ki jab sajde mein sar pata hun main

le gae kis ke ruKH o gesu bahaar-e-roz-o-shab

muddaton se ghar ko be-sham-o-sahar pata hun main

dur hoti hai rah-e-ghurbat mein koson ki thakan

jab kisi manzil pe koi ham-safar pata hun main

ahl-e-mahfil honge kya ahl-e-basirat ai 'shafiq'

mir-e-mahfil hi ko be-fikr-o-nazar pata hun main