kab tak dil ki KHair manaen kab tak rah dikhlaoge

kab tak dil kī ḳhair manā.eñ kab tak rah dikhlāoge

kab tak chain kī mohlat doge kab tak yaad na aaoge

biitā diid ummīd kā mausam ḳhaak uḌtī hai āñkhoñ meñ

kab bhejoge dard kā bādal kab barkhā barsāoge

ahd-e-vafā yā tark-e-mohabbat jo chāho so aap karo

apne bas kī baat hī kyā hai ham se kyā manvāoge

kis ne vasl kā sūraj dekhā kis par hijr kī raat Dhalī

gesuoñ vaale kaun the kyā the un ko kyā jatlāoge

'faiz' diloñ ke bhaag meñ hai ghar bharnā bhī luT jaanā bhī

tum is husn ke lutf-o-karam par kitne din itrāoge

kab tak dil ki KHair manaen kab tak rah dikhlaoge

kab tak chain ki mohlat doge kab tak yaad na aaoge

bita did ummid ka mausam KHak uDti hai aankhon mein

kab bhejoge dard ka baadal kab barkha barsaoge

ahd-e-wafa ya tark-e-mohabbat jo chaho so aap karo

apne bas ki baat hi kya hai hum se kya manwaoge

kis ne wasl ka suraj dekha kis par hijr ki raat Dhali

gesuon wale kaun the kya the un ko kya jatlaoge

'faiz' dilon ke bhag mein hai ghar bharna bhi luT jaana bhi

tum is husn ke lutf-o-karam par kitne din itraoge