kab tak phirunga hath mein kasa uTha ke main

kab tak phiruñgā haath meñ kaasa uThā ke maiñ

jī chāhtā hai bhaag luuñ duniyā uThā ke maiñ

hotī hai niiñd meñ kahīñ tashkīl-e-ḳhadd-o-ḳhāl

uThtā huuñ apne ḳhvāb kā chehra uThā ke maiñ

ba.ad az sadā-e-kun huī taqsīm-e-hast-o-būd

phirtā thā kā.enāt akelā uThā ke maiñ

kyūñkar na sahl ho mujhe rāh-e-dayār-e-ishq

laayā huuñ dasht-e-najd kā naqsha uThā ke maiñ

baḌhne lagā thā nashsha-e-taḳhlīq-e-āb o ḳhaak

vo chaak uThā ke chal diyā kuuza uThā ke maiñ

hai sā.at-e-visāl ke malne pe munhasir

kas samt bhāgtā huuñ ye lamha uThā ke maiñ

qurbat-pasand dil kī tabī.at meñ thā tazād

ḳhush ho rahā huuñ hijr kā sadma uThā maiñ

ab mujh ko ehtimām se kiije supurd-e-ḳhāk

uktā chukā huuñ jism kā malba uThā ke maiñ

achchhā bhalā to thā tan-e-tanhā jahān meñ

pachhtā rahā huuñ ḳhalq kā beḌā uThā ke maiñ

'āzar' mujhe madīne se hijrat kā hukm thā

sahrā meñ le ke aa gayā ḳhema uThā ke maiñ

kab tak phirunga hath mein kasa uTha ke main

ji chahta hai bhag lun duniya uTha ke main

hoti hai nind mein kahin tashkil-e-KHadd-o-KHal

uThta hun apne KHwab ka chehra uTha ke main

baad az sada-e-kun hui taqsim-e-hast-o-bud

phirta tha kaenat akela uTha ke main

kyunkar na sahl ho mujhe rah-e-dayar-e-ishq

laya hun dasht-e-najd ka naqsha uTha ke main

baDhne laga tha nashsha-e-taKHliq-e-ab o KHak

wo chaak uTha ke chal diya kuza uTha ke main

hai saat-e-visal ke malne pe munhasir

kas samt bhagta hun ye lamha uTha ke main

qurbat-pasand dil ki tabiat mein tha tazad

KHush ho raha hun hijr ka sadma uTha main

ab mujh ko ehtimam se kije supurd-e-KHak

ukta chuka hun jism ka malba uTha ke main

achchha bhala to tha tan-e-tanha jahan mein

pachhta raha hun KHalq ka beDa uTha ke main

'azar' mujhe madine se hijrat ka hukm tha

sahra mein le ke aa gaya KHema uTha ke main