kab talak baat karun main teri taswir ke sath

kab talak baat karūñ maiñ tirī tasvīr ke saath

lafz lipTe haiñ mire halqa-e-zanjīr ke saath

ḳhvāb meñ dekhā thā kal raat nazāra kaisā

ek zanjīr bañdhī thī mirī tasvīr ke saath

hashr tak jiit kā armān liye baiThā rahā

vaqt kī naav pe TuuTī huī shamshīr ke saath

baat ham ko na samajh aa.ī tumhārī ab tak

baat ham ko zarā samjhāo to tafsīr ke saath

jurm hañstā rahā tā-der adālat meñ aaj

aur sach rotā rahā jhuuT kī tahrīr ke saath

kaam kuchh kar hī gayā tark-e-ta.alluq 'anvar'

naam letā thā mirā aaj vo tauqīr ke saath

kab talak baat karun main teri taswir ke sath

lafz lipTe hain mere halqa-e-zanjir ke sath

KHwab mein dekha tha kal raat nazara kaisa

ek zanjir bandhi thi meri taswir ke sath

hashr tak jit ka arman liye baiTha raha

waqt ki naw pe TuTi hui shamshir ke sath

baat hum ko na samajh aai tumhaari ab tak

baat hum ko zara samjhao to tafsir ke sath

jurm hansta raha ta-der adalat mein aaj

aur sach rota raha jhuT ki tahrir ke sath

kaam kuchh kar hi gaya tark-e-talluq 'anwar'

nam leta tha mera aaj wo tauqir ke sath