kab talak piwega tu tar-damanon se mil ke mul

kab talak pīvegā tū tar-dāmanoñ se mil ke mul

ek dam ai ġhuncha-lab ham se kabhī to khil ke khul

be-sar-o-bargoñ ko kyā nisbat hai sair-e-bāġh se

dāġh-e-dil haiñ ham tahī-dastān-e-pā dar-gil ke gul

us kī jañg-e-be-sabab kā hai taġhāful hī ilaaj

aap Dhelā ho ke āvegā idhar Dhal Dhal ke Dhul

zer-e-abrū is tarah mizhgāñ nahīñ rahtī mudām

sar pe mere juuñ rahe hai teġh us qātil kī tul

rabt kuchh bazm-e-mashā.eḳh se nahīñ rindoñ ke ta.iiñ

kab liye ye mast sāġhar ke sivā qulqul kī qul

ho sake to baḳhiya o marham kā yaaro vaqt hai

jaañ na jaave is tan-e-majrūh meñ ghā.el ke ghul

bā-qad-e-ḳham-gashta huuñ rone se nit ke maiñ ḳharāb

mauj-e-dariyā toḌte haiñ jis tarah pil pil ke pul

chille kī mānind khīñchūñ jab talak bar meñ na tañg

kab miTe hai us but-e-harjā.ī-e-chanchal kī chul

daur meñ us zulf ke hai bas ki dīvānoñ kī dhuum

suntā huuñ chāroñ taraf se maiñ sadā-e-ġhul ke ġhul

'hasrat' us ke daam meñ phañsnā muqaddar thā mirā

the mirī nazroñ meñ to pech-o-ḳham us kākul ke kul

kab talak piwega tu tar-damanon se mil ke mul

ek dam ai ghuncha-lab hum se kabhi to khil ke khul

be-sar-o-bargon ko kya nisbat hai sair-e-bagh se

dagh-e-dil hain hum tahi-dastan-e-pa dar-gil ke gul

us ki jang-e-be-sabab ka hai taghaful hi ilaj

aap Dhela ho ke aawega idhar Dhal Dhal ke Dhul

zer-e-abru is tarah mizhgan nahin rahti mudam

sar pe mere jun rahe hai tegh us qatil ki tul

rabt kuchh bazm-e-mashaeKH se nahin rindon ke tain

kab liye ye mast saghar ke siwa qulqul ki qul

ho sake to baKHiya o marham ka yaro waqt hai

jaan na jawe is tan-e-majruh mein ghael ke ghul

ba-qad-e-KHam-gashta hun rone se nit ke main KHarab

mauj-e-dariya toDte hain jis tarah pil pil ke pul

chille ki manind khinchun jab talak bar mein na tang

kab miTe hai us but-e-harjai-e-chanchal ki chul

daur mein us zulf ke hai bas ki diwanon ki dhum

sunta hun chaaron taraf se main sada-e-ghul ke ghul

'hasrat' us ke dam mein phansna muqaddar tha mera

the meri nazron mein to pech-o-KHam us kakul ke kul