kab talak shadabi-e-fikr-o-nazar kaam aaegi

kab talak shādābī-e-fikr-o-nazar kaam aa.egī

giile kapḌe se havā paanī uḌā le jā.egī

bhāgte ghoḌe kī rāseñ khīñchne se fā.eda

Dūbte sūraj kī kyā raftār kam ho jā.egī

zehan par phailā rakhe haiñ jhīñguroñ ne dā.ere

aaj jo bhī baat sochūñgā mujhe uljhā.egī

tak rahe haiñ kis kī jānib najam ḳheme gaaḌ kar

dhuup niklegī to pahle mere ghar meñ aa.egī

khil uThā huuñ aaj maiñ bhī us kī sūrat dekh kar

ye ghaḌī jab aa.egī mujh ko yūñhī mahkā.egī

fasl sūraj meñ ugī hai tamtamātī hai zamīñ

ye kahānī pyaar karne se samajh meñ aa.egī

jism kī putlī ko raushan kar ke duniyā se guzar

aañkh ḳhvāhish kī nazar rakhtī hai dhokā khā.egī

zard patte kī tarah be-ghar paḌā huuñ raah meñ

zard patte ko koī shāḳh-e-havā apnā.egī

miTTiyoñ kī tah meñ motī pāniyoñ par dā.ere

sochtā huuñ kaun sī daulat mire haath aa.egī

saath letī jā hameñ bhī Dūbte sūraj kī dhuup

raat ke ġhāroñ meñ terī yaad ham ko aa.egī

vo bhī ḳhushbū kī tarah ḳhud se alag rahne lagā

jaane ye mauj-e-ḳhayāl us ko kahāñ le jā.egī

khil rahī hai ḳhvāhishoñ kī dhuup saare jism meñ

aañkh kholūñgā to ye tasvīr bhī kho jā.egī

bastiyoñ meñ jañgaloñ meñ vādiyoñ meñ koh meñ

merī ḳhushbū merī dhaḌkan merī aahaT jā.egī

kitnī tasvīreñ mire andar se ubhareñgī 'ḳhalīl'

jab tirī āvāz kānoñ se mire Takrā.egī

kab talak shadabi-e-fikr-o-nazar kaam aaegi

gile kapDe se hawa pani uDa le jaegi

bhagte ghoDe ki rasen khinchne se faeda

Dubte suraj ki kya raftar kam ho jaegi

zehan par phaila rakhe hain jhinguron ne daere

aaj jo bhi baat sochunga mujhe uljhaegi

tak rahe hain kis ki jaanib najam KHeme gaD kar

dhup niklegi to pahle mere ghar mein aaegi

khil uTha hun aaj main bhi us ki surat dekh kar

ye ghaDi jab aaegi mujh ko yunhi mahkaegi

fasl suraj mein ugi hai tamtamati hai zamin

ye kahani pyar karne se samajh mein aaegi

jism ki putli ko raushan kar ke duniya se guzar

aankh KHwahish ki nazar rakhti hai dhoka khaegi

zard patte ki tarah be-ghar paDa hun rah mein

zard patte ko koi shaKH-e-hawa apnaegi

miTTiyon ki tah mein moti paniyon par daere

sochta hun kaun si daulat mere hath aaegi

sath leti ja hamein bhi Dubte suraj ki dhup

raat ke ghaaron mein teri yaad hum ko aaegi

wo bhi KHushbu ki tarah KHud se alag rahne laga

jaane ye mauj-e-KHayal us ko kahan le jaegi

khil rahi hai KHwahishon ki dhup sare jism mein

aankh kholunga to ye taswir bhi kho jaegi

bastiyon mein jangalon mein wadiyon mein koh mein

meri KHushbu meri dhaDkan meri aahaT jaegi

kitni taswiren mere andar se ubharengi 'KHalil'

jab teri aawaz kanon se mere Takraegi