kab ziya-bar tera chehra-e-zeba hoga

kab ziyā-bār tirā chehra-e-zebā hogā

kyā jab āñkheñ na raheñgī to ujālā hogā

mashġhala us ne ajab sauñp diyā hai yaaro

umr bhar sochte rahiye ki vo kaisā hogā

jaane kis rañg se rūThegī tabī.at us kī

jaane kis Dhañg se ab us ko manānā hogā

is taraf shahr udhar Duub rahā thā sūraj

kaun sailāb ke manzar pe na royā hogā

yahī andāz-e-tijārat hai to kal kā tājir

barf ke baaT liye dhuup meñ baiThā hogā

dekhnā haal zarā ret kī dīvāroñ kā

jab chalī tez havā ek tamāshā hogā

āstīnoñ kī chamak ne hameñ maarā 'anvar'

ham to ḳhanjar ko bhī samjhe yad-e-baizā hogā

kab ziya-bar tera chehra-e-zeba hoga

kya jab aankhen na rahengi to ujala hoga

mashghala us ne ajab saunp diya hai yaro

umr bhar sochte rahiye ki wo kaisa hoga

jaane kis rang se ruThegi tabiat us ki

jaane kis Dhang se ab us ko manana hoga

is taraf shahr udhar Dub raha tha suraj

kaun sailab ke manzar pe na roya hoga

yahi andaz-e-tijarat hai to kal ka tajir

barf ke baT liye dhup mein baiTha hoga

dekhna haal zara ret ki diwaron ka

jab chali tez hawa ek tamasha hoga

aastinon ki chamak ne hamein mara 'anwar'

hum to KHanjar ko bhi samjhe yad-e-baiza hoga