kabhi apnon ki yurish thi kabhi ghairon ka rela tha

kabhī apnoñ kī yūrish thī kabhī ġhairoñ kā relā thā

tire milne kī ḳhātir ham ne kyā kyā dukh na jhelā thā

mire ahbāb kyā be-vaqt mere paas aa baiThe

ghaTā ghanghor thī vo apne kamre meñ akelā thā

hamārā shām-e-tanhā.ī meñ pursāñ hī na thā koī

vo jis mahfil meñ jaate the vahīñ yāroñ kā melā thā

mohabbat kī junūñ-añgeziyoñ se ham bhī vāqif haiñ

javānī meñ javāno ham ne bhī ye khel khelā thā

udhar vo the ki thī ik daulat-e-bedār paas un ke

idhar ham the ki apnī jeb meñ paisa na Dhelā thā

huī muddat ki un ko ḳhvāb meñ bhī ab nahīñ dekhā

maiñ jin galiyoñ meñ apne dostoñ ke saath khelā thā

javānī meñ hamārī tund-ḳhūī ek aafat thī

hamāre dam se har mahfil meñ jhagḌā thā jhamelā thā

'hamīd' us chāh-e-ġham se aaj tak bāhar nahīñ aayā

azīzoñ ne use muddat huī jis meñ Dhakelā thā

kabhi apnon ki yurish thi kabhi ghairon ka rela tha

tere milne ki KHatir hum ne kya kya dukh na jhela tha

mere ahbab kya be-waqt mere pas aa baiThe

ghaTa ghanghor thi wo apne kamre mein akela tha

hamara sham-e-tanhai mein pursan hi na tha koi

wo jis mahfil mein jate the wahin yaron ka mela tha

mohabbat ki junun-angeziyon se hum bhi waqif hain

jawani mein jawano hum ne bhi ye khel khela tha

udhar wo the ki thi ek daulat-e-bedar pas un ke

idhar hum the ki apni jeb mein paisa na Dhela tha

hui muddat ki un ko KHwab mein bhi ab nahin dekha

main jin galiyon mein apne doston ke sath khela tha

jawani mein hamari tund-KHui ek aafat thi

hamare dam se har mahfil mein jhagDa tha jhamela tha

'hamid' us chah-e-gham se aaj tak bahar nahin aaya

azizon ne use muddat hui jis mein Dhakela tha