kabhi be-niyaz-e-maKHzan kabhi dushman-e-kinara

kabhī be-niyāz-e-maḳhzan kabhī dushman-e-kinārā

kahīñ tujh ko le na Duube tirī zindagī kā dhārā

mirī quvvat-e-nazar kā ka.ī ruḳh se imtihāñ hai

kabhī uzr-e-lan-tarānī kabhī dāvat-e-nazārā

ġham-e-ishq hī ne kaaTī ġham-e-ishq kī musībat

isī mauj ne Duboyā isī mauj ne ubhārā

tire ġham kī parda-poshī jo isī kī muqtazī hai

to qasam hai tere ġham kī mujhe har ḳhushī gavārā

dam-e-sub.h-e-nau-bahārāñ jo kalī chaman meñ chaTkī

to gumāñ huā ki jaise mujhe aap ne pukārā

mire nāḳhudā na ghabrā ye nazar hai apnī apnī

tire sāmne hai tūfāñ mire sāmne kinārā

mirī kashti-e-tamannā kabhī ḳhushkiyoñ meñ Duubī

kabhī bahr-e-ġham kā tinkā mujhe de gayā sahārā

tirā haq bhī sar ba-zānū mirā kufr bhī pashīmāñ

mujhe āgahī ne luuTā tujhe ġhaflatoñ ne maarā

ye karam ye mehrbānī tirī 'fārūq'-e-hazīñ par

ye gila hai kyuuñ na baḳhshā mujhe shukriye kā yaarā

kabhi be-niyaz-e-maKHzan kabhi dushman-e-kinara

kahin tujh ko le na Dube teri zindagi ka dhaara

meri quwwat-e-nazar ka kai ruKH se imtihan hai

kabhi uzr-e-lan-tarani kabhi dawat-e-nazara

gham-e-ishq hi ne kaTi gham-e-ishq ki musibat

isi mauj ne Duboya isi mauj ne ubhaara

tere gham ki parda-poshi jo isi ki muqtazi hai

to qasam hai tere gham ki mujhe har KHushi gawara

dam-e-subh-e-nau-bahaaran jo kali chaman mein chaTki

to guman hua ki jaise mujhe aap ne pukara

mere naKHuda na ghabra ye nazar hai apni apni

tere samne hai tufan mere samne kinara

meri kashti-e-tamanna kabhi KHushkiyon mein Dubi

kabhi bahr-e-gham ka tinka mujhe de gaya sahaara

tera haq bhi sar ba-zanu mera kufr bhi pashiman

mujhe aagahi ne luTa tujhe ghaflaton ne mara

ye karam ye mehrbani teri 'faruq'-e-hazin par

ye gila hai kyun na baKHsha mujhe shukriye ka yara