kabhi hans kar kabhi aansu baha kar dekh leta hun

kabhī hañs kar kabhī aañsū bahā kar dekh letā huuñ

maiñ har chehre ko ā.īna dikhā kar dekh letā huuñ

bahut bechain kar detī haiñ jab tanhā.iyāñ ghar kī

dar-o-dīvār par shakleñ banā kar dekh letā huuñ

chhupātā hai bahut mujh ko mirā saaya magar phir bhī

maiñ ḳhud ko raushnī se duur jā kar dekh letā huuñ

nazar aatā nahīñ jab harf koī lauh-e-ālam par

maiñ apnā naam likh kar aur miTā kar dekh letā huuñ

jise dekhā nahīñ hai dekh kar bhī merī āñkhoñ ne

maiñ us ko apne ḳhvāboñ meñ sajā kar dekh letā huuñ

nahīñ miltā kahīñ jab apnī hastī kā nishāñ mujh ko

maiñ apnā aks paanī meñ bahā kar dekh letā huuñ

jise dekhā nahīñ rotā huuñ us kī yaad meñ shab-bhar

jise paayā nahīñ us ko gañvā kar dekh letā huuñ

kabhī karnā ho andāza jab apne dard kā mujh ko

maiñ us bedard ke dil ko dukhā kar dekh letā huuñ

pahan letī haiñ jab shāḳheñ hare mausam ke pairāhan

koī TuuTā huā pattā uThā kar dekh letā huuñ

kabhi hans kar kabhi aansu baha kar dekh leta hun

main har chehre ko aaina dikha kar dekh leta hun

bahut bechain kar deti hain jab tanhaiyan ghar ki

dar-o-diwar par shaklen bana kar dekh leta hun

chhupata hai bahut mujh ko mera saya magar phir bhi

main KHud ko raushni se dur ja kar dekh leta hun

nazar aata nahin jab harf koi lauh-e-alam par

main apna nam likh kar aur miTa kar dekh leta hun

jise dekha nahin hai dekh kar bhi meri aankhon ne

main us ko apne KHwabon mein saja kar dekh leta hun

nahin milta kahin jab apni hasti ka nishan mujh ko

main apna aks pani mein baha kar dekh leta hun

jise dekha nahin rota hun us ki yaad mein shab-bhar

jise paya nahin us ko ganwa kar dekh leta hun

kabhi karna ho andaza jab apne dard ka mujh ko

main us bedard ke dil ko dukha kar dekh leta hun

pahan leti hain jab shaKHen hare mausam ke pairahan

koi TuTa hua patta uTha kar dekh leta hun