kabhi hota hun zahir jalwa-e-husn-e-niko ho kar

kabhī hotā huuñ zāhir jalva-e-husn-e-niko ho kar

kabhī ḳhātir meñ chhup jaatā huuñ terī aarzū ho kar

kabhī kam ho ke sharmātā huuñ misl-e-qatra sāġhar meñ

kabhī kasrat se ruk jaatā huuñ shīshe kā gulū ho kar

baḌhā letā huuñ aksar rabt yār-e-pāk-dāman se

lipaT jaatā huuñ dast-o-pā se maiñ āb-e-vuzū ho kar

sukūnat se bahut baḌh ke hai merī ḳhāna-bar-doshī

rahā kartā huuñ har ḳhātir meñ terī justujū ho kar

nahīñ hai ehtiyāj-e-ġhair vaqt-e-josh-e-betābī

chhalak jaatā huuñ be-taklīf saaqī maiñ subū ho kar

sikhā.ī hai na.ī tadbīr mujh ko merī ḳhātir ne

pasand aatā huuñ dushman ko bhī terī guftugū ho kar

nahīñ chaltī koī tadbīr kyā kyā fikr karte haiñ

maiñ kar detā huuñ qaa.il sab ko terī guftugū ho kar

taqāzā-e-tamannā se na ik jā do-ghaḌī baiThe

phirāyā umr-bhar aalam meñ terī justujū ho kar

na kyuuñ kar shor ho aalam meñ merī fikr-e-ḳhātir kā

diloñ ko khīñch letā huuñ tumhārā rañg-e-rū ho kar

nahīñ mumkin kabhī tar-dāmanī meñ farq kuchh aa.e

bahā karte haiñ ashk-e-chashm mere āb-jū ho kar

nishāñ kyā pūchhte ho be-nishānoñ ke Thikānoñ kā

dimāġhoñ meñ rahā kartā huuñ maiñ gesū kī bū ho kar

kabhī mulk-e-halab meñ huuñ kabhī shahr-e-ḳhutan meñ huuñ

nahīñ rahtā tirī shohrat kī sūrat ek sū ho kar

ḳharāsh-e-zaḳhm-e-sīna muddatoñ kā duur kartā huuñ

lipaT jaatā huuñ jab shāne se zulf-e-mushk-bū ho kar

kamī maiñ bhī mirī hastī kī hastī aur paidā hai

kabhī abrū bhī ban jaatā huuñ qasr-e-ābrū ho kar

uThā letā huuñ jo aa.e musībat apne sar par maiñ

sahā kartā huuñ zulm-e-dil-rubā āshiq kī ḳhū ho kar

bhalī ko bhī samajhtā huuñ burī har dost dushman kī

nahīñ qaabū meñ maiñ rahtā mizāj-e-jañg-jū ho kar

mire soz-e-darūñ meñ sau tarah ke lutf hāsil haiñ

jalātā huuñ diloñ ko yād-e-yār-e-sham.a-rū ho kar

lahū se pairahan tar dekh kar yāroñ ne farmāyā

'nasīm' aayā hai kū-e-yār se kyā surḳh-rū ho kar

kabhi hota hun zahir jalwa-e-husn-e-niko ho kar

kabhi KHatir mein chhup jata hun teri aarzu ho kar

kabhi kam ho ke sharmata hun misl-e-qatra saghar mein

kabhi kasrat se ruk jata hun shishe ka gulu ho kar

baDha leta hun aksar rabt yar-e-pak-daman se

lipaT jata hun dast-o-pa se main aab-e-wuzu ho kar

sukunat se bahut baDh ke hai meri KHana-bar-doshi

raha karta hun har KHatir mein teri justuju ho kar

nahin hai ehtiyaj-e-ghair waqt-e-josh-e-betabi

chhalak jata hun be-taklif saqi main subu ho kar

sikhai hai nai tadbir mujh ko meri KHatir ne

pasand aata hun dushman ko bhi teri guftugu ho kar

nahin chalti koi tadbir kya kya fikr karte hain

main kar deta hun qail sab ko teri guftugu ho kar

taqaza-e-tamanna se na ek ja do-ghaDi baiThe

phiraya umr-bhar aalam mein teri justuju ho kar

na kyun kar shor ho aalam mein meri fikr-e-KHatir ka

dilon ko khinch leta hun tumhaara rang-e-ru ho kar

nahin mumkin kabhi tar-damani mein farq kuchh aae

baha karte hain ashk-e-chashm mere aab-ju ho kar

nishan kya puchhte ho be-nishanon ke Thikanon ka

dimaghon mein raha karta hun main gesu ki bu ho kar

kabhi mulk-e-halab mein hun kabhi shahr-e-KHutan mein hun

nahin rahta teri shohrat ki surat ek su ho kar

KHarash-e-zaKHm-e-sina muddaton ka dur karta hun

lipaT jata hun jab shane se zulf-e-mushk-bu ho kar

kami main bhi meri hasti ki hasti aur paida hai

kabhi abru bhi ban jata hun qasr-e-abru ho kar

uTha leta hun jo aae musibat apne sar par main

saha karta hun zulm-e-dil-ruba aashiq ki KHu ho kar

bhali ko bhi samajhta hun buri har dost dushman ki

nahin qabu mein main rahta mizaj-e-jang-ju ho kar

mere soz-e-darun mein sau tarah ke lutf hasil hain

jalata hun dilon ko yaad-e-yar-e-shama-ru ho kar

lahu se pairahan tar dekh kar yaron ne farmaya

'nasim' aaya hai ku-e-yar se kya surKH-ru ho kar