kabhi jab muddaton ke baad us ka samna hoga

kabhī jab muddatoñ ke ba.ad us kā sāmnā hogā

sivā.e paas ādāb-e-takalluf aur kyā hogā

yahāñ vo kaun hai jo intiḳhāb-e-ġham pe qādir ho

jo mil jaa.e vahī ġham dostoñ kā mudda.ā hogā

naved-e-sar-ḳhushī jab aa.egī us vaqt tak shāyad

hameñ zahr-e-ġham-e-hastī gavārā ho chukā hogā

salīb-e-vaqt par maiñ ne pukārā thā mohabbat ko

mirī āvāz jis ne bhī sunī hogī hañsā hogā

abhī ik shor-e-hā-o-hū sunā hai sārbānoñ ne

vo pāgal qāfile kī zid meñ pīchhe rah gayā hogā

hamāre shauq ke āsūda-o-ḳhush-hāl hone tak

tumhāre āriz-o-gesū kā saudā ho chukā hogā

navā.eñ nik.hateñ āsūda chehre dil-nashīñ rishte

magar ik shaḳhs is māhaul meñ kyā sochtā hogā

hañsī aatī hai mujh ko maslahat ke in taqāzoñ par

ki ab ik ajnabī ban kar use pahchānñā hogā

dalīloñ se davā kā kaam lenā saḳht mushkil hai

magar is ġham kī ḳhātir ye hunar bhī sīkhnā hogā

vo munkir hai to phir shāyad har ik maktūb-e-shauq us ne

sar-añgusht-e-hinā.ī se ḳhalāoñ meñ likhā hogā

hai nisf-e-shab vo dīvāna abhī tak ghar nahīñ aayā

kisī se chāñdnī rātoñ kā qissa chhiḌ gayā hogā

sabā shikvā hai mujh ko un darīchoñ se darīchoñ se

darīchoñ meñ to dīmak ke sivā ab aur kyā hogā

kabhi jab muddaton ke baad us ka samna hoga

siwae pas aadab-e-takalluf aur kya hoga

yahan wo kaun hai jo intiKHab-e-gham pe qadir ho

jo mil jae wahi gham doston ka muddaa hoga

nawed-e-sar-KHushi jab aaegi us waqt tak shayad

hamein zahr-e-gham-e-hasti gawara ho chuka hoga

salib-e-waqt par main ne pukara tha mohabbat ko

meri aawaz jis ne bhi suni hogi hansa hoga

abhi ek shor-e-ha-o-hu suna hai sarbanon ne

wo pagal qafile ki zid mein pichhe rah gaya hoga

hamare shauq ke aasuda-o-KHush-haal hone tak

tumhaare aariz-o-gesu ka sauda ho chuka hoga

nawaen nikhaten aasuda chehre dil-nashin rishte

magar ek shaKHs is mahaul mein kya sochta hoga

hansi aati hai mujh ko maslahat ke in taqazon par

ki ab ek ajnabi ban kar use pahchanna hoga

dalilon se dawa ka kaam lena saKHt mushkil hai

magar is gham ki KHatir ye hunar bhi sikhna hoga

wo munkir hai to phir shayad har ek maktub-e-shauq us ne

sar-angusht-e-hinai se KHalaon mein likha hoga

hai nisf-e-shab wo diwana abhi tak ghar nahin aaya

kisi se chandni raaton ka qissa chhiD gaya hoga

saba shikwa hai mujh ko un darichon se darichon se

darichon mein to dimak ke siwa ab aur kya hoga