کبھی جو دھوپ ہمارے مکاں میں آ جائے

کبھی جو دھوپ ہمارے مکاں میں آ جائے

تو سایہ دار شجر بھی اماں میں آ جائے

میں شاہزادہ نہیں تو فقیر ہی بہتر

کہیں تو ذکر مرا داستاں میں آ جائے

میں تیرا نام سلیقے سے تو پکاروں مگر

خدا نخواستہ لکنت زباں میں آ جائے

کسے ڈبونا ہے اور کس کو پار کرنا ہے

شعور اتنا تو آب رواں میں آ جائے

میں ایک لمحے کو صدیوں کی زندگی سمجھوں

مرا یقیں جو حصار گماں میں آ جائے

جھلس چکا ہے بہت دھوپ میں بدن میرا

سو اس سے کہتا ہوں اب سائباں میں آ جائے

میں اپنی عقل سے کچھ اور کام لے لوں گا

کبھی یہ دل بھی مرا امتحاں میں آ جائے

سفر کی ساری اذیت پہ خاک اڑتی ہے

بھٹک کے کوئی اگر کارواں میں آ جائے

میں جس کو راز بتاتا ہوں اپنی خلوت کے

عجب نہیں کہ صف دشمناں میں آ جائے