kabhi jo KHatm na ho aisi tazgi de di

kabhī jo ḳhatm na ho aisī tāzgī de dī

tirī vafā ne na.ī mujh ko zindagī de dī

hamāre paas thā kyā aur matā-e-dil ke sivā

tire savāl pe vo bhī ḳhushī ḳhushī de dī

vo shaḳhs kaun thā jis ke ḳhulūs-e-paiham ne

mirī hayāt ko sūraj sī raushnī de dī

ajiib baat hai jis ne hayāt māñgī thī

use to maut milī mujh ko zindagī de dī

maiñ apne daur se kis darja sharmsār rahe

ġhazab kiyā mujhe irfān-o-āgahī de dī

taḌap taḌap ke jiye jis ke pyaar meñ 'afshāñ'

usī kī yaad meñ lo aaj jaan bhī de dī

kabhi jo KHatm na ho aisi tazgi de di

teri wafa ne nai mujh ko zindagi de di

hamare pas tha kya aur mata-e-dil ke siwa

tere sawal pe wo bhi KHushi KHushi de di

wo shaKHs kaun tha jis ke KHulus-e-paiham ne

meri hayat ko suraj si raushni de di

ajib baat hai jis ne hayat mangi thi

use to maut mili mujh ko zindagi de di

main apne daur se kis darja sharmsar rahe

ghazab kiya mujhe irfan-o-agahi de di

taDap taDap ke jiye jis ke pyar mein 'afshan'

usi ki yaad mein lo aaj jaan bhi de di