kabhi KHushi se KHushi ki taraf nahin dekha

kabhī ḳhushī se ḳhushī kī taraf nahīñ dekhā

tumhāre ba.ad kisī kī taraf nahīñ dekhā

ye soch kar ki tirā intizār lāzim hai

tamām-umr ghaḌī kī taraf nahīñ dekhā

yahāñ to jo bhī hai āb-e-ravāñ kā āshiq hai

kisī ne ḳhushk nadī kī taraf nahīñ dekhā

vo jis ke vāste pardes jā rahā huuñ maiñ

bichhaḌte vaqt usī kī taraf nahīñ dekhā

na rok le hameñ rotā huā koī chehra

chale to muḌ ke galī kī taraf nahīñ dekhā

bichhaḌte vaqt bahut mutma.in the ham donoñ

kisī ne muḌ ke kisī kī taraf nahīñ dekhā

ravish buzurgoñ kī shāmil hai merī ghuTTī meñ

zarūratan bhī sakhī kī taraf nahīñ dekhā

kabhi KHushi se KHushi ki taraf nahin dekha

tumhaare baad kisi ki taraf nahin dekha

ye soch kar ki tera intizar lazim hai

tamam-umr ghaDi ki taraf nahin dekha

yahan to jo bhi hai aab-e-rawan ka aashiq hai

kisi ne KHushk nadi ki taraf nahin dekha

wo jis ke waste pardes ja raha hun main

bichhaDte waqt usi ki taraf nahin dekha

na rok le hamein rota hua koi chehra

chale to muD ke gali ki taraf nahin dekha

bichhaDte waqt bahut mutmain the hum donon

kisi ne muD ke kisi ki taraf nahin dekha

rawish buzurgon ki shamil hai meri ghuTTi mein

zaruratan bhi sakhi ki taraf nahin dekha