kabhi mahr-o-mah-o-nujum se kabhi kahkashan se guzar gaya

kabhī mahr-o-māh-o-nujūm se kabhī kahkashāñ se guzar gayā

maiñ tirī talāsh meñ āḳhirash had-e-lā-makāñ se guzar gayā

ye tafā.ut-e-sanam-o-haram hai tabhī ki jab bhī nasha ho kam

jo bhī ġharq-e-bāda-e-haq huā ġham-e-īn-o-āñ se guzar gayā

kabhī shahr-e-husn-e-ḳhayāl se kabhī dasht-e-huzn-o-malāl se

tire ishq meñ tere pyaar meñ maiñ kahāñ kahāñ se guzar gayā

tirī rahguzar mirī rahguzar tire naqsh-e-pā mirī raah par

tū jahāñ jahāñ se guzar gayā maiñ vahāñ vahāñ se guzar gayā

rah-e-zindagī meñ maqām vo mujhe bār-hā mile dosto

ki ḳhirad kā paañv phisal gayā hai junūñ jahāñ se guzar gayā

mirā jism kyā mirī ruuh kyā nahīñ koī zaḳhmoñ kī intihā

ai 'amīr' tīr-e-nigāh-e-husn kahāñ kahāñ se guzar gayā

kabhi mahr-o-mah-o-nujum se kabhi kahkashan se guzar gaya

main teri talash mein aaKHirash had-e-la-makan se guzar gaya

ye tafaut-e-sanam-o-haram hai tabhi ki jab bhi nasha ho kam

jo bhi gharq-e-baada-e-haq hua gham-e-in-o-an se guzar gaya

kabhi shahr-e-husn-e-KHayal se kabhi dasht-e-huzn-o-malal se

tere ishq mein tere pyar mein main kahan kahan se guzar gaya

teri rahguzar meri rahguzar tere naqsh-e-pa meri rah par

tu jahan jahan se guzar gaya main wahan wahan se guzar gaya

rah-e-zindagi mein maqam wo mujhe bar-ha mile dosto

ki KHirad ka panw phisal gaya hai junun jahan se guzar gaya

mera jism kya meri ruh kya nahin koi zaKHmon ki intiha

ai 'amir' tir-e-nigah-e-husn kahan kahan se guzar gaya