kabhi naghma-e-gham-e-arzu kabhi zindagi ki pukar hum

kabhī naġhma-e-ġham-e-ārzū kabhī zindagī kī pukār ham

kabhī ḳhāk-e-kūcha-e-yār ham kabhī shahryār-e-bahār ham

kabhī chal paḌe tirī raah meñ to had-e-junūñ se guzar ga.e

tire intizār meñ ho ga.e kabhī naqsh-e-rāh-guzār ham

hameñ kushtagān-e-hayāt se haiñ junūn-e-ishq kī azmateñ

kabhī hañs paḌe tah-e-teġh ham kabhī jhuum uThe sar-e-dār ham

rahe muztarib kabhī muddatoñ ġham-e-dahr kī kaḌī dhuup meñ

jo sukūñ milā hai to so liye kabhī zer-e-gesū-e-yār ham

tujhe pā sakeñ ki na pā sakeñ koī zindagī kī lagan to hai

ki ḳhushī se kaise ujaaḌ deñ tirī aarzū kā dayār ham

ġham-e-zindagī se shikast kyā rah-e-ārzū meñ qadam baḌhā

tū jo saath ho to badal bhī deñ ye mizāj-e-lail-o-nahār ham

kabhī paas aa ke nigāh kar hai ye zindagī tirā aa.ina

tirā ruup ham tirā pyaar ham tirī aarzū kā siñgār ham

kabhi naghma-e-gham-e-arzu kabhi zindagi ki pukar hum

kabhi KHak-e-kucha-e-yar hum kabhi shahryar-e-bahaar hum

kabhi chal paDe teri rah mein to had-e-junun se guzar gae

tere intizar mein ho gae kabhi naqsh-e-rah-guzar hum

hamein kushtagan-e-hayat se hain junun-e-ishq ki azmaten

kabhi hans paDe tah-e-tegh hum kabhi jhum uThe sar-e-dar hum

rahe muztarib kabhi muddaton gham-e-dahr ki kaDi dhup mein

jo sukun mila hai to so liye kabhi zer-e-gesu-e-yar hum

tujhe pa saken ki na pa saken koi zindagi ki lagan to hai

ki KHushi se kaise ujaD den teri aarzu ka dayar hum

gham-e-zindagi se shikast kya rah-e-arzu mein qadam baDha

tu jo sath ho to badal bhi den ye mizaj-e-lail-o-nahaar hum

kabhi pas aa ke nigah kar hai ye zindagi tera aaina

tera rup hum tera pyar hum teri aarzu ka singar hum