kabhi salib ki surat kabhi hilali tha

kabhī salīb kī sūrat kabhī hilālī thā

mirī nigāh meñ ik paikar-e-ḳhayālī thā

hamārī aap kī shāyad koī misāl nahīñ

jo mar gayā hai vahī aadmī misālī thā

ka.ī patañg kī sūrat ḳhalā meñ Duub gayā

vo jitnā tez thā itnā hī lā-ubālī thā

uḌā aur uḌ ke fazāoñ meñ ho gayā tahlīl

badan ke bojh se us kā vajūd ḳhālī thā

vo toḌ letā thā patte havā kī shāḳhoñ se

kamāl us kā haqīqat meñ be-kamālī thā

banā huā thā jo shahr-e-vafā kā shahzāda

vo maiñ nahīñ thā mirā zauq-e-ḳhush-jamālī thā

maiñ chhuptā phirtā thā shahroñ meñ kohsāroñ meñ

vo ek shaḳhs magar har jagah savālī thā

paḌā thā raah meñ jo sañg-e-mīl se aage

vo apne vaqt kā 'farhat' nahīñ ġhazālī thā

kabhi salib ki surat kabhi hilali tha

meri nigah mein ek paikar-e-KHayali tha

hamari aap ki shayad koi misal nahin

jo mar gaya hai wahi aadmi misali tha

kai patang ki surat KHala mein Dub gaya

wo jitna tez tha itna hi la-ubaali tha

uDa aur uD ke fazaon mein ho gaya tahlil

badan ke bojh se us ka wajud KHali tha

wo toD leta tha patte hawa ki shaKHon se

kamal us ka haqiqat mein be-kamali tha

bana hua tha jo shahr-e-wafa ka shahzada

wo main nahin tha mera zauq-e-KHush-jamali tha

main chhupta phirta tha shahron mein kohsaron mein

wo ek shaKHs magar har jagah sawali tha

paDa tha rah mein jo sang-e-mil se aage

wo apne waqt ka 'farhat' nahin ghazali tha