kabhi shaKHon pe baiThenge kabhi diwar par panchhi

kabhī shāḳhoñ pe baiTheñge kabhī dīvār par panchhī

kahāñ ḳhvāhish pe aate haiñ sar-e-shāḳh-e-shajar panchhī

banā kar ghoñsla nanhā sā aksar shāḳh par panchhī

bashar dekhe ḳhushī se jhūmte haiñ kis qadar panchhī

kisī kī āmad-e-ḳhush-kun kā muzhda kaun detā hai

banere boltā kaagā na ab vo ḳhush-ḳhabar panchhī

maiñ kaise dil ko samjhā.ūñ ruteñ vo ho ga.iiñ ruḳhsat

hasīñ jhūle ḳhunuk saaya samar shīrīñ shajar panchhī

shajar kī Tahniyāñ jhūle fazā.eñ rah-guzar un kī

nazar aate haiñ kaise Daar meñ shīr-o-shakar panchhī

payām-e-shauq pahuñchā yuuñ dayār-e-yār tak 'akram'

kabhī dast-e-sabā qāsid kabhī ye nāma-bar panchhī

kabhi shaKHon pe baiThenge kabhi diwar par panchhi

kahan KHwahish pe aate hain sar-e-shaKH-e-shajar panchhi

bana kar ghonsla nanha sa aksar shaKH par panchhi

bashar dekhe KHushi se jhumte hain kis qadar panchhi

kisi ki aamad-e-KHush-kun ka muzhda kaun deta hai

banere bolta kaga na ab wo KHush-KHabar panchhi

main kaise dil ko samjhaun ruten wo ho gain ruKHsat

hasin jhule KHunuk saya samar shirin shajar panchhi

shajar ki Tahniyan jhule fazaen rah-guzar un ki

nazar aate hain kaise Dar mein shir-o-shakar panchhi

payam-e-shauq pahuncha yun dayar-e-yar tak 'akram'

kabhi dast-e-saba qasid kabhi ye nama-bar panchhi