kabhi sham-e-hijr guzarte kabhi zulf-e-yar sanwarte

kabhī shām-e-hijr guzārte kabhī zulf-e-yār sañvārte

kaTī umr apnī qafas qafas tirī ḳhushbuoñ ko pukārte

na vo mah-jabīnoñ kī Toliyāñ na vo rañg rañg kī boliyāñ

na mohabbatoñ kī vo bāziyāñ kabhī jīt.te kabhī hārte

vo jo ārzūoñ ke ḳhvāb the vo ḳhayāl the vo sarāb the

sar-e-dasht ek bhī gul na thā jise āñsuoñ se sañvārte

thā jo ek lamha visāl kā vo riyāz thā ka.ī saal kā

vahī ek pal meñ guzar gayā jise umr guzrī pukārte

the jo jaan se bhī azīz-tar rahe umr bhar vahī be-ḳhabar

thī ye aarzū mire chārā-gar mirī naav paar utārte

nahīñ lab pe koī savāl thā mirā dil tamām malāl thā

maiñ ḳhamosh dar pe khaḌā rahā rahe vo bhī gesū sañvārte

kabhi sham-e-hijr guzarte kabhi zulf-e-yar sanwarte

kaTi umr apni qafas qafas teri KHushbuon ko pukarte

na wo mah-jabinon ki Toliyan na wo rang rang ki boliyan

na mohabbaton ki wo baziyan kabhi jitte kabhi haarte

wo jo aarzuon ke KHwab the wo KHayal the wo sarab the

sar-e-dasht ek bhi gul na tha jise aansuon se sanwarte

tha jo ek lamha visal ka wo riyaz tha kai sal ka

wahi ek pal mein guzar gaya jise umr guzri pukarte

the jo jaan se bhi aziz-tar rahe umr bhar wahi be-KHabar

thi ye aarzu mere chaara-gar meri naw par utarte

nahin lab pe koi sawal tha mera dil tamam malal tha

main KHamosh dar pe khaDa raha rahe wo bhi gesu sanwarte