kabhi surur-e-be-KHudi kabhi surur-e-agahi

kabhī surūr-e-be-ḳhudī kabhī surūr-e-āgahī

haqīqatoñ kā vāsta 'ajīb shai hai zindagī

tirā ḳhayāl de gayā hai aasrā kahīñ kahīñ

tirā firāq hausle baḌhā gayā kabhī kabhī

isī meñ kuchh sukūn hai shu'ūr-e-ġham kā saath deñ

yahī ḳhushī kī baat hai chale chaleñ ḳhushī ḳhushī

hazār TūTte ga.e tilism rūp-rañg ke

magar na chain se rahā mirā shi.ār-e-but-garī

chaman meñ kaun dekhiye sahar kī taab lā sake

ye raat bhar kī os meñ nahā ga.ī kalī kalī

guzar ga.e usī taraf se irtiqā ke qāfile

magar usī dayār meñ luTā ḳhulūs-e-ādmī

vo merā āshiyāñ hī kyā tamām aag thī lagī

yahī kaho ki bach ga.ī chaman kī phuul pankhuḌī

qarīb-e-sub.h kyā kahūñ 'ajīb ik havā chalī

jhukī har ek shāḳh-e-gul kalī kī aañkh lag ga.ī

hai chāk-e-gul kā mājrā jarāhatoñ kā silsila

vo zaḳhm phir na bhar sakā girī jahāñ se pankhuḌī

'shahāb'-e-nukta-sanj ne rakhā hai saiñt saiñt ke

salīqa-e-kalām kī jo saakh hai rahī-sahī

kabhi surur-e-be-KHudi kabhi surur-e-agahi

haqiqaton ka wasta 'ajib shai hai zindagi

tera KHayal de gaya hai aasra kahin kahin

tera firaq hausle baDha gaya kabhi kabhi

isi mein kuchh sukun hai shu'ur-e-gham ka sath den

yahi KHushi ki baat hai chale chalen KHushi KHushi

hazar TuTte gae tilism rup-rang ke

magar na chain se raha mera shiar-e-but-gari

chaman mein kaun dekhiye sahar ki tab la sake

ye raat bhar ki os mein naha gai kali kali

guzar gae usi taraf se irtiqa ke qafile

magar usi dayar mein luTa KHulus-e-admi

wo mera aashiyan hi kya tamam aag thi lagi

yahi kaho ki bach gai chaman ki phul pankhuDi

qarib-e-subh kya kahun 'ajib ek hawa chali

jhuki har ek shaKH-e-gul kali ki aankh lag gai

hai chaak-e-gul ka majra jarahaton ka silsila

wo zaKHm phir na bhar saka giri jahan se pankhuDi

'shahab'-e-nukta-sanj ne rakha hai saint saint ke

saliqa-e-kalam ki jo sakh hai rahi-sahi