kabhi suraj ko baadal aur ghaTaen bojh lagti hain

kabhī sūraj ko bādal aur ghaTā.eñ bojh lagtī haiñ

kabhī bujhte charāġhoñ ko havā.eñ bojh lagtī haiñ

kabhī yuuñ thā ki aatā thā bhañvar se ḳhauf logoñ ko

kabhī in bādbānoñ kī vafā.eñ bojh lagtī haiñ

bahut nārāz hai mujh se mirī shah-rag kā ham-sāya

jise chhoTī-baḌī merī ḳhatā.eñ bojh lagtī haiñ

sahāre bhuul jaate haiñ asīr-e-ārzū ho kar

javāñ aulād ho jaa.e to maa.eñ bojh lagtī haiñ

kuchh aise log haiñ rishtoñ pe jo jaañ vaar dete haiñ

ye aise log haiñ jin ko anā.eñ bojh lagtī haiñ

kabhi suraj ko baadal aur ghaTaen bojh lagti hain

kabhi bujhte charaghon ko hawaen bojh lagti hain

kabhi yun tha ki aata tha bhanwar se KHauf logon ko

kabhi in baadbanon ki wafaen bojh lagti hain

bahut naraaz hai mujh se meri shah-rag ka ham-saya

jise chhoTi-baDi meri KHataen bojh lagti hain

sahaare bhul jate hain asir-e-arzu ho kar

jawan aulad ho jae to maen bojh lagti hain

kuchh aise log hain rishton pe jo jaan war dete hain

ye aise log hain jin ko anaen bojh lagti hain