kabhi to aisa bhi ho rah bhul jaun main

kabhī to aisā bhī ho raah bhuul jā.ūñ maiñ

nikal ke ghar se na phir apne ghar meñ aa.uuñ maiñ

bikher de mujhe chāroñ taraf ḳhalāoñ meñ

kuchh is tarah se alag kar ki juḌ na pā.ūñ maiñ

ye jo akele meñ parchhā.iyāñ sī bantī haiñ

bikhar hī jā.eñgī lekin kise dikhā.ūñ maiñ

mirā makān agar biich meñ na aa.e to

in ūñche ūñche makānoñ ko phāñd jā.ūñ maiñ

gavāhī detā vahī merī be-gunāhī kī

vo mar gayā to use ab kahāñ se lā.ūñ maiñ

ye zindagī to kahīñ ḳhatm hī nahīñ hotī

ab aur kitne dinoñ ye azaab uThā.ūñ maiñ

ġhazal kahī hai koī bhāñg to nahīñ pī hai

mushā.ere meñ tarannum se kyuuñ sunā.ūñ maiñ

are vo aap ke dīvān kyā hue 'alvī'

bike na hoñ to kabāḌī ko saath lā.ūñ maiñ

kabhi to aisa bhi ho rah bhul jaun main

nikal ke ghar se na phir apne ghar mein aaun main

bikher de mujhe chaaron taraf KHalaon mein

kuchh is tarah se alag kar ki juD na paun main

ye jo akele mein parchhaiyan si banti hain

bikhar hi jaengi lekin kise dikhaun main

mera makan agar bich mein na aae to

in unche unche makanon ko phand jaun main

gawahi deta wahi meri be-gunahi ki

wo mar gaya to use ab kahan se laun main

ye zindagi to kahin KHatm hi nahin hoti

ab aur kitne dinon ye azab uThaun main

ghazal kahi hai koi bhang to nahin pi hai

mushaere mein tarannum se kyun sunaun main

are wo aap ke diwan kya hue 'alwi'

bike na hon to kabaDi ko sath laun main