kabhi to dil ka kaha dil se wo sunega hi

kabhī to dil kā kahā dil se vo sunegā hī

ye qatra sañg meñ sūrāḳh to karegā hī

vo mere haath se barsāt ke zamāne meñ

pakauḌe khā.egā aur chaa.e bhī piyegā hī

suhānī shaam kisī dil-nashīñ vaadī meñ

vo do hī saath saath chale chalegā hī

abhī ye soch ke maiñ zulm sahtī jaatī huuñ

kabhī to haath tire zulm kā rukegā hī

ye dāġh-e-dil nahīñ jo chhup sake chhupāne se

badan kā zaḳhm hai ab ḳhuun to bahegā hī

asiir sab haiñ fanā ke hisār meñ lekin

ḳhudā kī yaad se behtar sila milegā hī

shu.ūr se hī bashar chāñd par bhī pahuñchā hai

zamāna ilm kī daulat se to baḌhegā hī

koī ġhurūr meñ elān-e-ḳhud-sarī kar le

ḳhudā ke sāmne āḳhir ko sar jhukegā hī

'sabīla' tere haqīqat bayān karne se

jahāñ pe rāz-e-junūñ ek din khulegā hī

kabhi to dil ka kaha dil se wo sunega hi

ye qatra sang mein suraKH to karega hi

wo mere hath se barsat ke zamane mein

pakauDe khaega aur chae bhi piyega hi

suhani sham kisi dil-nashin wadi mein

wo do hi sath sath chale chalega hi

abhi ye soch ke main zulm sahti jati hun

kabhi to hath tere zulm ka rukega hi

ye dagh-e-dil nahin jo chhup sake chhupane se

badan ka zaKHm hai ab KHun to bahega hi

asir sab hain fana ke hisar mein lekin

KHuda ki yaad se behtar sila milega hi

shuur se hi bashar chand par bhi pahuncha hai

zamana ilm ki daulat se to baDhega hi

koi ghurur mein elan-e-KHud-sari kar le

KHuda ke samne aaKHir ko sar jhukega hi

'sabila' tere haqiqat bayan karne se

jahan pe raaz-e-junun ek din khulega hi