kabhi to pyar se lega wo nam apna bhi

kabhī to pyaar se legā vo naam apnā bhī

qubūl hogā kisī din salām apnā bhī

kabhī to ham bhī rag-e-gul se kaaT deñ patthar

jahāñ meñ kuchh to ho mash.hūr naam apnā bhī

koī to jhāñkegā merī taraf darīche se

kisī nigāh meñ hogā maqām apnā bhī

is aarzū meñ sar-e-rāh baiTh jaatā huuñ

vahāñ se lā.egā qāsid payām apnā bhī

vo jis ke dil meñ jagah hai musāfiroñ ke liye

ye kyā zarūr kare intizām apnā bhī

machī haiñ shahr meñ jis ke ḳhulūs kī dhūmeñ

vo shaḳhs kuchh to kare intizām apnā bhī

mujhe yaqīn hai saaqī ke lutf par 'anvar'

sharāb-e-husn se bhar degā jaam apnā bhī

kabhi to pyar se lega wo nam apna bhi

qubul hoga kisi din salam apna bhi

kabhi to hum bhi rag-e-gul se kaT den patthar

jahan mein kuchh to ho mashhur nam apna bhi

koi to jhankega meri taraf dariche se

kisi nigah mein hoga maqam apna bhi

is aarzu mein sar-e-rah baiTh jata hun

wahan se laega qasid payam apna bhi

wo jis ke dil mein jagah hai musafiron ke liye

ye kya zarur kare intizam apna bhi

machi hain shahr mein jis ke KHulus ki dhumen

wo shaKHs kuchh to kare intizam apna bhi

mujhe yaqin hai saqi ke lutf par 'anwar'

sharab-e-husn se bhar dega jam apna bhi