kabhi un ka nam lena kabhi unki baat karna

kabhī un kā naam lenā kabhī un kī baat karnā

mirā zauq un kī chāhat mirā shauq un pe marnā

vo kisī kī jhiil āñkheñ vo mirī junūñ-mizājī

kabhī Dūbnā ubhar kar kabhī Duub kar ubharnā

tire manchaloñ kā jag meñ ye ajab chalan rahā hai

na kisī kī baat sunñā, na kisī se baat karnā

shab-e-ġham na pūchh kaise tire mubtalā pe guzrī

kabhī aah bhar ke girnā kabhī gir ke aah bharnā

vo tirī galī ke tevar, vo nazar nazar pe pahre

vo mirā kisī bahāne tujhe dekhte guzarnā

kahāñ mere dil kī hasrat, kahāñ merī nā-rasā.ī

kahāñ tere gesuoñ kaa, tire dosh par bikharnā

chale laakh chaal duniyā ho zamāna laakh dushman

jo tirī panāh meñ ho use kyā kisī se Darnā

vo kareñge nā-ḳhudā.ī to lagegī paar kashtī

hai 'nasīr' varna mushkil, tirā paar yuuñ utarnā

kabhi un ka nam lena kabhi un ki baat karna

mera zauq un ki chahat mera shauq un pe marna

wo kisi ki jhil aankhen wo meri junun-mizaji

kabhi Dubna ubhar kar kabhi Dub kar ubharna

tere manchalon ka jag mein ye ajab chalan raha hai

na kisi ki baat sunna, na kisi se baat karna

shab-e-gham na puchh kaise tere mubtala pe guzri

kabhi aah bhar ke girna kabhi gir ke aah bharna

wo teri gali ke tewar, wo nazar nazar pe pahre

wo mera kisi bahane tujhe dekhte guzarna

kahan mere dil ki hasrat, kahan meri na-rasai

kahan tere gesuon ka, tere dosh par bikharna

chale lakh chaal duniya ho zamana lakh dushman

jo teri panah mein ho use kya kisi se Darna

wo karenge na-KHudai to lagegi par kashti

hai 'nasir' warna mushkil, tera par yun utarna