kabhi zillat kabhi ruswai nahin dekhi hai

kabhī zillat kabhī rusvā.ī nahīñ dekhī hai

ishq vāloñ ne to paspā.ī nahīñ dekhī hai

husn-e-yūsuf ke mujhe qisse sunāne vaale

tū ne chāhat ye zuleḳhā.ī nahīñ dekhī hai

us ne chehre pe qasīde to bahut likkhe haiñ

lekin is dil pe jamī kaa.ī nahīñ dekhī hai

mil ke bāñTā thā asāsa jo kabhī bhā.iyoñ ne

saath khelī thī jo māñ-jā.ī nahīñ dekhī hai

apnī aulād ko fāqoñ se bachāne ke liye

DaañT sahtī huī ik baa.ī nahīñ dekhī hai

tum ne chāhat ko javāñ rakkhā hai in āñkhoñ meñ

mujh meñ dam toḌtī tanhā.ī nahīñ dekhī hai

apnī ḳhush-fahmī pe ḳhush huuñ ki abhī tak maiñ ne

ġhair se us kī shanāsā.ī nahīñ dekhī hai

pyaar daulat hai magar maiñ ne to is daulat kī

halfiya kahtī huuñ ik paa.ī nahīñ dekhī hai

kabhi zillat kabhi ruswai nahin dekhi hai

ishq walon ne to paspai nahin dekhi hai

husn-e-yusuf ke mujhe qisse sunane wale

tu ne chahat ye zuleKHai nahin dekhi hai

us ne chehre pe qaside to bahut likkhe hain

lekin is dil pe jami kai nahin dekhi hai

mil ke banTa tha asasa jo kabhi bhaiyon ne

sath kheli thi jo man-jai nahin dekhi hai

apni aulad ko faqon se bachane ke liye

DanT sahti hui ek bai nahin dekhi hai

tum ne chahat ko jawan rakkha hai in aankhon mein

mujh mein dam toDti tanhai nahin dekhi hai

apni KHush-fahmi pe KHush hun ki abhi tak main ne

ghair se us ki shanasai nahin dekhi hai

pyar daulat hai magar main ne to is daulat ki

halfiya kahti hun ek pai nahin dekhi hai