kabk o qumri mein hai jhagDa ki chaman kis ka hai

kabk o qumrī meñ hai jhagḌā ki chaman kis kā hai

kal batā degī ḳhizāñ ye ki vatan kis kā hai

faisla gardish-e-daurāñ ne kiyā hai sau baar

marv kis kā hai badaḳhshān o ḳhutan kis kā hai

dam se yūsuf ke jab ābād thā yāqūb kā ghar

charḳh kahtā thā ki ye bait-e-huzan kis kā hai

mutma.in is se musalmāñ na masīhī na yahūd

dost kyā jāniye ye charḳh-e-kuhan kis kā hai

vaa.iz ik aib se tū paak hai yā zāt-e-ḳhudā

varna be-aib zamāne meñ chalan kis kā hai

aaj kuchh aur dinoñ se hai sivā istiġhrāq

azm-e-tasḳhīr phir ai sheḳh-e-zaman kis kā hai

aañkh paḌtī hai har ik ahl-e-nazar kī tum par

tum meñ ruup ai gul o nasrīn o saman kis kā hai

ishq udhar aql idhar dhun meñ chale haiñ terī

rasta ab dekhiye donoñ meñ kaThin kis kā hai

shaan dekhī nahīñ gar tū ne chaman meñ us kī

valvala tujh meñ ye ai murġh-e-chaman kis kā hai

haiñ fasāhat meñ masal vaa.iz o 'hālī' donoñ

dekhnā ye hai ki be-lāg suḳhan kis kā hai

kabk o qumri mein hai jhagDa ki chaman kis ka hai

kal bata degi KHizan ye ki watan kis ka hai

faisla gardish-e-dauran ne kiya hai sau bar

marw kis ka hai badaKHshan o KHutan kis ka hai

dam se yusuf ke jab aabaad tha yaqub ka ghar

charKH kahta tha ki ye bait-e-huzan kis ka hai

mutmain is se musalman na masihi na yahud

dost kya jaaniye ye charKH-e-kuhan kis ka hai

waiz ek aib se tu pak hai ya zat-e-KHuda

warna be-aib zamane mein chalan kis ka hai

aaj kuchh aur dinon se hai siwa istighraq

azm-e-tasKHir phir ai sheKH-e-zaman kis ka hai

aankh paDti hai har ek ahl-e-nazar ki tum par

tum mein rup ai gul o nasrin o saman kis ka hai

ishq udhar aql idhar dhun mein chale hain teri

rasta ab dekhiye donon mein kaThin kis ka hai

shan dekhi nahin gar tu ne chaman mein us ki

walwala tujh mein ye ai murgh-e-chaman kis ka hai

hain fasahat mein masal waiz o 'haali' donon

dekhna ye hai ki be-lag suKHan kis ka hai