kaDa hai din baDi hai raat jab se tum nahin aae

kaḌā hai din baḌī hai raat jab se tum nahīñ aa.e

digar-gūñ haiñ mire hālāt jab se tum nahīñ aa.e

lagī rahtī hai ashkoñ kī jhaḌī garmī ho sardī ho

nahīñ ruktī kabhī barsāt jab se tum nahīñ aa.e

na kī jaatī hai auroñ se mulāqāt ek lamhe ko

na ho paatī hai ḳhud se baat jab se tum nahīñ aa.e

patā chaltā nahīñ thā sā.atoñ kā jab tum aate the

guzarte haiñ garāñ lamhāt jab se tum nahīñ aa.e

na ghar vaale na ham-sā.e na ahbāb-o-a.izzā haiñ

ye dil hai yā ḳhudā kī zaat jab se tum nahīñ aa.e

kaDa hai din baDi hai raat jab se tum nahin aae

digar-gun hain mere haalat jab se tum nahin aae

lagi rahti hai ashkon ki jhaDi garmi ho sardi ho

nahin rukti kabhi barsat jab se tum nahin aae

na ki jati hai auron se mulaqat ek lamhe ko

na ho pati hai KHud se baat jab se tum nahin aae

pata chalta nahin tha saaton ka jab tum aate the

guzarte hain garan lamhat jab se tum nahin aae

na ghar wale na ham-sae na ahbab-o-aizza hain

ye dil hai ya KHuda ki zat jab se tum nahin aae