kaf-e-momin se na darwaza-e-dauran se mila

kaf-e-momin se na darvāza-e-daurāñ se milā

rishta-e-dard usī dushman-e-īmāñ se milā

is kā ronā hai ki paimāñ-shikanī ke bā-vasf

vo sitamgar usī peshānī-e-ḳhandāñ se milā

tālib-e-dast-e-havas aur ka.ī dāman the

ham se miltā jo na yūsuf ke garebāñ se milā

koī baaqī nahīñ ab tark-e-ta.alluq ke liye

vo bhī jā kar saf-e-ahbāb-e-gurezāñ se milā

kyā kaheñ is ko jo mahfil meñ shanāsā bhī na thā

kabhī ḳhalvat meñ dar aayā to dil-o-jāñ se milā

maiñ usī koh-sifat ḳhuun kī ik buuñd huuñ jo

reg-zār-e-najaf o ḳhāk-e-ḳhurāsāñ se milā

kaf-e-momin se na darwaza-e-dauran se mila

rishta-e-dard usi dushman-e-iman se mila

is ka rona hai ki paiman-shikani ke ba-wasf

wo sitamgar usi peshani-e-KHandan se mila

talib-e-dast-e-hawas aur kai daman the

hum se milta jo na yusuf ke gareban se mila

koi baqi nahin ab tark-e-talluq ke liye

wo bhi ja kar saf-e-ahbab-e-gurezan se mila

kya kahen is ko jo mahfil mein shanasa bhi na tha

kabhi KHalwat mein dar aaya to dil-o-jaan se mila

main usi koh-sifat KHun ki ek bund hun jo

reg-zar-e-najaf o KHak-e-KHurasan se mila