kah do koi saqi se ki hum marte hain pyase

kah do koī saaqī se ki ham marte haiñ pyāse

gar mai nahīñ de zahr hī kā jaam balā se

jo kuchh hai so hai us ke taġhāful kī shikāyat

qāsid se hai takrār na jhagḌā hai sabā se

dallāla ne ummīd dilā.ī to hai lekin

dete nahīñ kuchh dil ko tasallī ye dilāse

hai vasl to taqdīr ke haath ai shah-e-ḳhūbāñ

yaañ haiñ to faqat terī mohabbat ke haiñ pyāse

pyāse tire sar-gashta haiñ jo rāh-e-talab meñ

hoñToñ ko vo karte nahīñ tar āb-e-baqā se

dar guzre davā se to bharose pe duā ke

dar guzreñ duā se bhī duā hai ye ḳhudā se

ik dard ho bas aaTh pahar dil meñ ki jis ko

taḳhfīf davā se ho na taskīn duā se

'hālī' dil-e-insāñ meñ hai gum daulat-e-kaunain

sharminda hoñ kyuuñ ġhair ke ehsān-o-atā se

jab vaqt paḌe dījiye dastak dar-e-dil par

jhukiye fuqarā se na jhamkiye umrā se

kah do koi saqi se ki hum marte hain pyase

gar mai nahin de zahr hi ka jam bala se

jo kuchh hai so hai us ke taghaful ki shikayat

qasid se hai takrar na jhagDa hai saba se

dallala ne ummid dilai to hai lekin

dete nahin kuchh dil ko tasalli ye dilase

hai wasl to taqdir ke hath ai shah-e-KHuban

yan hain to faqat teri mohabbat ke hain pyase

pyase tere sar-gashta hain jo rah-e-talab mein

honTon ko wo karte nahin tar aab-e-baqa se

dar guzre dawa se to bharose pe dua ke

dar guzren dua se bhi dua hai ye KHuda se

ek dard ho bas aaTh pahar dil mein ki jis ko

taKHfif dawa se ho na taskin dua se

'haali' dil-e-insan mein hai gum daulat-e-kaunain

sharminda hon kyun ghair ke ehsan-o-ata se

jab waqt paDe dijiye dastak dar-e-dil par

jhukiye fuqara se na jhamkiye umra se