kaha hai kis ne jahan mein KHuda nahin milta

kahā hai kis ne jahāñ meñ ḳhudā nahīñ miltā

ḳhulūs shart hai DhūñDo to kyā nahīñ miltā

har ek jism kī taḳhlīq ek jaisī hai

har ek chehre se kyoñ dūsrā nahīñ miltā

kuchh aise moḌ bhī aa.e vafā kī rāhoñ meñ

jahāñ se aage ḳhud apnā patā nahīñ miltā

har ik jafā hai tumhārī har ik jafā se alag

tumhāre jaisā koī bā-vafā nahīñ miltā

maiñ phir rahā huuñ jabīñ meñ sameT kar sajde

magar kahīñ bhī tirā naqsh-e-pā nahīñ miltā

vahī hai gaañv vahī maiñ vahī hai pagDanDī

bas ik kamī hai tirā naqsh-e-pā nahīñ miltā

vafā kā shauq mubārak vafā karo lekin

rahe ḳhayāl vafā kā sila nahīñ miltā

tumhārā aks hai mahfūz jis meñ sadiyoñ se

na jaane kyoñ vahī ik aa.ina nahīñ miltā

ham aa ke gaañv se pachhtā.e shahr meñ 'rāhī'

yahāñ kisī kā bhī aslī pata nahīñ miltā

kaha hai kis ne jahan mein KHuda nahin milta

KHulus shart hai DhunDo to kya nahin milta

har ek jism ki taKHliq ek jaisi hai

har ek chehre se kyon dusra nahin milta

kuchh aise moD bhi aae wafa ki rahon mein

jahan se aage KHud apna pata nahin milta

har ek jafa hai tumhaari har ek jafa se alag

tumhaare jaisa koi ba-wafa nahin milta

main phir raha hun jabin mein sameT kar sajde

magar kahin bhi tera naqsh-e-pa nahin milta

wahi hai ganw wahi main wahi hai pagDanDi

bas ek kami hai tera naqsh-e-pa nahin milta

wafa ka shauq mubarak wafa karo lekin

rahe KHayal wafa ka sila nahin milta

tumhaara aks hai mahfuz jis mein sadiyon se

na jaane kyon wahi ek aaina nahin milta

hum aa ke ganw se pachhtae shahr mein 'rahi'

yahan kisi ka bhi asli pata nahin milta