kaha jo maine ki yusuf ko ye hijab na tha

kahā jo maiñ ne ki yūsuf ko ye hijāb na thā

to hañs ke bole vo muñh qābil-e-naqāb na thā

shab-e-visāl bhī vo shoḳh be-hijāb na thā

naqāb ulaT ke bhī dekhā to be-naqāb na thā

lipaT ke chuum liyā muñh miTā diyā un kā

nahīñ kā un ke sivā is ke kuchh javāb na thā

mire janāze pe ab aate sharm aatī hai

halāl karne ko baiThe the jab hijāb na thā

nasīb jaag uThe so ga.e jo paañv mire

tumhāre kūche se behtar maqām-e-ḳhvāb na thā

ġhazab kiyā ki ise tū ne mohtasib toḌā

are ye dil thā mirā shīsha-e-sharāb na thā

zamāna vasl meñ letā hai karvaTeñ kyā kyā

firāq-e-yār ke din ek inqalāb na thā

tumhīñ ne qatl kiyā hai mujhe jo tante ho

akele the malak-ul-maut ham-rikāb na thā

duā-e-tauba bhī ham ne paḌhī to mai pī kar

maza hī ham ko kisī shai kā be-sharāb na thā

maiñ rū-e-yār kā mushtāq ho ke aaya thā

tire jamāl kā shaidā to ai naqāb na thā

bayān kī jo shab-e-ġham kī bekasī to kahā

jigar meñ dard na thā dil meñ iztirāb na thā

vo baiThe baiThe jo de baiThe qatl-e-ām kā hukm

hañsī thī un kī kisī par koī itaab na thā

jo laash bhejī thī qāsid kī bhejte ḳhat bhī

rasīd vo to mire ḳhat kī thī javāb na thā

surūr-e-qatl se thī haath paañv ko jumbish

vo mujh pe vajd kā aalam thā iztirāb na thā

sabāt bahr-e-jahāñ meñ nahīñ kisī ko 'amīr'

idhar numūd huā aur udhar hubāb na thā

kaha jo main ne ki yusuf ko ye hijab na tha

to hans ke bole wo munh qabil-e-naqab na tha

shab-e-visal bhi wo shoKH be-hijab na tha

naqab ulaT ke bhi dekha to be-naqab na tha

lipaT ke chum liya munh miTa diya un ka

nahin ka un ke siwa is ke kuchh jawab na tha

mere janaze pe ab aate sharm aati hai

halal karne ko baiThe the jab hijab na tha

nasib jag uThe so gae jo panw mere

tumhaare kuche se behtar maqam-e-KHwab na tha

ghazab kiya ki ise tu ne mohtasib toDa

are ye dil tha mera shisha-e-sharab na tha

zamana wasl mein leta hai karwaTen kya kya

firaq-e-yar ke din ek inqalab na tha

tumhin ne qatl kiya hai mujhe jo tante ho

akele the malak-ul-maut ham-rikab na tha

dua-e-tauba bhi hum ne paDhi to mai pi kar

maza hi hum ko kisi shai ka be-sharab na tha

main ru-e-yar ka mushtaq ho ke aaya tha

tere jamal ka shaida to ai naqab na tha

bayan ki jo shab-e-gham ki bekasi to kaha

jigar mein dard na tha dil mein iztirab na tha

wo baiThe baiThe jo de baiThe qatl-e-am ka hukm

hansi thi un ki kisi par koi itab na tha

jo lash bheji thi qasid ki bhejte KHat bhi

rasid wo to mere KHat ki thi jawab na tha

surur-e-qatl se thi hath panw ko jumbish

wo mujh pe wajd ka aalam tha iztirab na tha

sabaat bahr-e-jahan mein nahin kisi ko 'amir'

idhar numud hua aur udhar hubab na tha