kaha maine meri aankhon mein pani hai

kahā maiñ ne mirī āñkhoñ meñ paanī hai

javāb aayā mohabbat kī nishānī hai

kahā maiñ ne lagī dil kī bujhānī hai

javāb aayā ye jazba jāvedānī hai

kahā maiñ ne khileñge kab vafā ke phuul

javāb aayā abhī mausam ḳhizānī hai

kahā maiñ ne mohabbat mehvar-e-hastī

javāb aayā balā-e-nā-gahānī hai

kahā maiñ ne ki har lamha sisaktā huuñ

javāb aayā ki ulfat to nibhānī hai

kahā maiñ ne sitam itnā nahīñ achchhā

javāb aayā mohabbat āzmānī hai

kahā maiñ ne matā-e-zīst ya.anī tū

javāb aayā yahāñ har chiiz faanī hai

kahā maiñ ne ki dekh in surḳh āñkhoñ meñ

javāb aayā mohabbat āsmānī hai

kahā maiñ ne ki kyoñ itne gurezāñ ho

javāb aayā tumhārī mehrbānī hai

kahā maiñ ne mirī ġhazloñ kī jaañ ho tum

javāb aayā tumhārī ḳhush-gumānī hai

kahā maiñ ne ḳhamoshī maar Dālegī

javāb un kā mukammal be-zabānī hai

kahā maiñ ne sunāo hāl-e-dil 'rāġhib'

javāb aayā bahut lambī kahānī hai

kaha main ne meri aankhon mein pani hai

jawab aaya mohabbat ki nishani hai

kaha main ne lagi dil ki bujhani hai

jawab aaya ye jazba jawedani hai

kaha main ne khilenge kab wafa ke phul

jawab aaya abhi mausam KHizani hai

kaha main ne mohabbat mehwar-e-hasti

jawab aaya bala-e-na-gahani hai

kaha main ne ki har lamha sisakta hun

jawab aaya ki ulfat to nibhani hai

kaha main ne sitam itna nahin achchha

jawab aaya mohabbat aazmani hai

kaha main ne mata-e-zist yani tu

jawab aaya yahan har chiz fani hai

kaha main ne ki dekh in surKH aankhon mein

jawab aaya mohabbat aasmani hai

kaha main ne ki kyon itne gurezan ho

jawab aaya tumhaari mehrbani hai

kaha main ne meri ghazlon ki jaan ho tum

jawab aaya tumhaari KHush-gumani hai

kaha main ne KHamoshi mar Dalegi

jawab un ka mukammal be-zabani hai

kaha main ne sunao haal-e-dil 'raghib'

jawab aaya bahut lambi kahani hai