kaha ye kis ne ki wade ka etibar na tha

kahā ye kis ne ki vā'de kā e'tibār na thā

vo aur baat thī jis se mujhe qarār na thā

shab-e-visāl vo kis naaz se ye kahte haiñ

hamāre hijr meñ sach-much tujhe qarār na thā

baghārtā hai jo ab shaiḳh zohd kī bāteñ

to kyā ye ahd-e-javānī meñ bāda-ḳhvār na thā

faqat thī ek ḳhamoshī mire suḳhan kā javāb

nahīñ nahīñ tujhe kahnā hazār baar na thā

ye mujh ko dekhte hī tū ne kyuuñ churā.ī aañkh

nigāh-e-lutf kā kyā maiñ umīd-vār na thā

vahī thiiñ 'aish kī rāteñ vahī the lutf ke din

kisī kī yaad kisī kā jab intizār na thā

hazār shukr ki niklā vo sādiqul-iqarār

tumheñ 'hafīz' kī bātoñ kā e'tibār na thā

kaha ye kis ne ki wa'de ka e'tibar na tha

wo aur baat thi jis se mujhe qarar na tha

shab-e-visal wo kis naz se ye kahte hain

hamare hijr mein sach-much tujhe qarar na tha

baghaarta hai jo ab shaiKH zohd ki baaten

to kya ye ahd-e-jawani mein baada-KHwar na tha

faqat thi ek KHamoshi mere suKHan ka jawab

nahin nahin tujhe kahna hazar bar na tha

ye mujh ko dekhte hi tu ne kyun churai aankh

nigah-e-lutf ka kya main umid-war na tha

wahi thin 'aish ki raaten wahi the lutf ke din

kisi ki yaad kisi ka jab intizar na tha

hazar shukr ki nikla wo sadiqul-iqarar

tumhein 'hafiz' ki baaton ka e'tibar na tha