kahan aa ke rukne the raste kahan moD tha use bhul ja

kahāñ aa ke rukne the rāste kahāñ moḌ thā use bhuul jā

vo jo mil gayā use yaad rakh jo nahīñ milā use bhuul jā

vo tire nasīb kī bārisheñ kisī aur chhat pe baras ga.iiñ

dil-e-be-ḳhabar mirī baat sun use bhuul jā use bhuul jā

maiñ to gum thā tere hī dhyān meñ tirī aas tere gumān meñ

sabā kah ga.ī mire kaan meñ mire saath aa use bhuul jā

kisī aañkh meñ nahīñ ashk-e-ġham tire ba.ad kuchh bhī nahīñ hai kam

tujhe zindagī ne bhulā diyā tū bhī muskurā use bhuul jā

kahīñ chāk-e-jāñ kā rafū nahīñ kisī āstīñ pe lahū nahīñ

ki shahīd-e-rāh-e-malāl kā nahīñ ḳhūñ-bahā use bhuul jā

kyuuñ aTā huā hai ġhubār meñ ġham-e-zindagī ke fishār meñ

vo jo dard thā tire baḳht meñ so vo ho gayā use bhuul jā

tujhe chāñd ban ke milā thā jo tire sāhiloñ pe khilā thā jo

vo thā ek dariyā visāl kā so utar gayā use bhuul jā

kahan aa ke rukne the raste kahan moD tha use bhul ja

wo jo mil gaya use yaad rakh jo nahin mila use bhul ja

wo tere nasib ki barishen kisi aur chhat pe baras gain

dil-e-be-KHabar meri baat sun use bhul ja use bhul ja

main to gum tha tere hi dhyan mein teri aas tere guman mein

saba kah gai mere kan mein mere sath aa use bhul ja

kisi aankh mein nahin ashk-e-gham tere baad kuchh bhi nahin hai kam

tujhe zindagi ne bhula diya tu bhi muskura use bhul ja

kahin chaak-e-jaan ka rafu nahin kisi aastin pe lahu nahin

ki shahid-e-rah-e-malal ka nahin KHun-baha use bhul ja

kyun aTa hua hai ghubar mein gham-e-zindagi ke fishaar mein

wo jo dard tha tere baKHt mein so wo ho gaya use bhul ja

tujhe chand ban ke mila tha jo tere sahilon pe khila tha jo

wo tha ek dariya visal ka so utar gaya use bhul ja