kahan ho kaun ho kya ho hamein batao to

kahāñ ho kaun ho kyā ho hameñ batāo to

nikal ke parda-e-dair-o-haram se aao to

añdherā phir na rahegā diye jalāo to

ruḳh-e-hayāt se ik ik naqāb uThāo to

maiñ apne jazb-e-mohabbat kā imtihāñ le luuñ

kuchh aur merī nigāhoñ se duur jaao to

zamāna ho gayā chhāyā hai gulsitāñ pe jumūd

chaman-parasto nayā gul koī khilāo to

ujāle sīna-e-zulmāt hī se nikleñge

charāġh-e-amn-o-mohabbat zarā jalāo to

qadam qadam pe banā.ūñgā ek shīsh-mahal

tum apne shahr meñ mujh ko kabhī bulāo to

zabāñ pe hogā tumhārī bhī shikva-e-duniyā

hamārī tarah zarā tum bhī choT khaao to

jhukegā ek zamāna tumhāre qadmoñ par

ḳhudā ke sāmne ai 'nūr' sar jhukāo to

kahan ho kaun ho kya ho hamein batao to

nikal ke parda-e-dair-o-haram se aao to

andhera phir na rahega diye jalao to

ruKH-e-hayat se ek ek naqab uThao to

main apne jazb-e-mohabbat ka imtihan le lun

kuchh aur meri nigahon se dur jao to

zamana ho gaya chhaya hai gulsitan pe jumud

chaman-parasto naya gul koi khilao to

ujale sina-e-zulmat hi se niklenge

charagh-e-amn-o-mohabbat zara jalao to

qadam qadam pe banaunga ek shish-mahal

tum apne shahr mein mujh ko kabhi bulao to

zaban pe hoga tumhaari bhi shikwa-e-duniya

hamari tarah zara tum bhi choT khao to

jhukega ek zamana tumhaare qadmon par

KHuda ke samne ai 'nur' sar jhukao to