kahan kahan se sunaun tumhein fasana-e-shab

kahāñ kahāñ se sunā.ūñ tumheñ fasāna-e-shab

tavīl guzrā hai mujh par bahut zamāna-e-shab

mahak rahā hai hamīñ se harīm-e-gulshan-e-roz

hamīñ se nūr-fazā hai nigār-ḳhāna-e-shab

huā hai hukm ye min-jānib-e-shah-e-zulmāt

hudūd-e-shahr-e-siyah chhoḌ de divān-e-shab

ḳhamosh hote haiñ din ke tamām-tar sikke

khanaktā rahtā hai kashkol-e-dil meñ āna-e-shab

har ek shāḳh pe vīrāniyāñ musallat haiñ

badan-daraḳht bhī goyā hai āshiyān-e-shab

tamām yādeñ to aa baiThtī haiñ shām-Dhale

udaas rahtā hai phir kis liye sirhāna-e-shab

umiid ḳhaak rakhī jaa.e ab ujāloñ kī

charāġh auñdhe paḌe haiñ ba-āstāna-e-shab

halāl rizq mayassar ho kyā unheñ 'sārim'

ki jin parindoñ ko chugnā hai sirf dāna-e-shab

kahan kahan se sunaun tumhein fasana-e-shab

tawil guzra hai mujh par bahut zamana-e-shab

mahak raha hai hamin se harim-e-gulshan-e-roz

hamin se nur-faza hai nigar-KHana-e-shab

hua hai hukm ye min-jaanib-e-shah-e-zulmat

hudud-e-shahr-e-siyah chhoD de diwan-e-shab

KHamosh hote hain din ke tamam-tar sikke

khanakta rahta hai kashkol-e-dil mein aana-e-shab

har ek shaKH pe viraniyan musallat hain

badan-daraKHt bhi goya hai aashiyan-e-shab

tamam yaaden to aa baiThti hain sham-Dhale

udas rahta hai phir kis liye sirhana-e-shab

umid KHak rakhi jae ab ujalon ki

charagh aundhe paDe hain ba-astana-e-shab

halal rizq mayassar ho kya unhen 'sarim'

ki jin parindon ko chugna hai sirf dana-e-shab