kahan kisi ka banaya hua banate hain

kahāñ kisī kā banāyā huā banāte haiñ

nayā banāte haiñ jab ham nayā banāte haiñ

kisī kā naqsh banāte haiñ lauh-e-dil par ham

kisī kā aks sar-e-ā.īna banāte haiñ

nayā banāne kī hasrat kabhī nahīñ martī

na.e sire se na.e ko nayā banāte haiñ

maiñ ik zamīn huuñ amn-o-amāñ kī mutlāshī

mire aziiz mujhe karbalā banāte haiñ

hamārī dasht-navardī ko gumrahī na samajh

bhaTakne vaale nayā rāsta banāte haiñ

kahīñ bhī jaa.eñ kisī shahr meñ sukūnat ho

ham apnī tarz kī aab o havā banāte haiñ

zamīneñ tañg huī jā rahī haiñ dil kī tarah

ham ab makān nahīñ maqbara banāte haiñ

''talab'' jo log qanā.at-pasand hote haiñ

vo zindagī ko kahāñ mas.ala banāte haiñ

kahan kisi ka banaya hua banate hain

naya banate hain jab hum naya banate hain

kisi ka naqsh banate hain lauh-e-dil par hum

kisi ka aks sar-e-aina banate hain

naya banane ki hasrat kabhi nahin marti

nae sire se nae ko naya banate hain

main ek zamin hun amn-o-aman ki mutlashi

mere aziz mujhe karbala banate hain

hamari dasht-nawardi ko gumrahi na samajh

bhaTakne wale naya rasta banate hain

kahin bhi jaen kisi shahr mein sukunat ho

hum apni tarz ki aab o hawa banate hain

zaminen tang hui ja rahi hain dil ki tarah

hum ab makan nahin maqbara banate hain

talab jo log qanaat-pasand hote hain

wo zindagi ko kahan masala banate hain