kahan socha tha maine bazm-arai se pahle

kahāñ sochā thā maiñ ne bazm-ārā.ī se pahle

ye merī āḳhirī mahfil hai tanhā.ī se pahle

bas ik sailāb thā lafzoñ kā jo ruktā nahīñ thā

ye halchal sat.h pe rahtī hai gahrā.ī se pahle

bahut din hosh-mandoñ ke kahe kā maan rakkhā

magar ab mashvara kartā huuñ saudā.ī se pahle

faqat rañgoñ ke is jhurmuT ko maiñ sach maan luuñ kyā

vo sab kuchh jhuuT thā dekhā jo bīnā.ī se pahle

kisī bhī jhuuT ko jiinā bahut mushkil nahīñ hai

faqat dil ko harā karnā hai sachchā.ī se pahle

ye āñkheñ bhiiḌ meñ ab tak usī ko DhūñDtī haiñ

jo saayā thā yahāñ pahle tamāshā.ī se pahle

kahan socha tha main ne bazm-arai se pahle

ye meri aaKHiri mahfil hai tanhai se pahle

bas ek sailab tha lafzon ka jo rukta nahin tha

ye halchal sath pe rahti hai gahrai se pahle

bahut din hosh-mandon ke kahe ka man rakkha

magar ab mashwara karta hun saudai se pahle

faqat rangon ke is jhurmuT ko main sach man lun kya

wo sab kuchh jhuT tha dekha jo binai se pahle

kisi bhi jhuT ko jina bahut mushkil nahin hai

faqat dil ko hara karna hai sachchai se pahle

ye aankhen bhiD mein ab tak usi ko DhunDti hain

jo saya tha yahan pahle tamashai se pahle