kahan talak kahun saqi ki la sharab to de

kahāñ talak kahūñ saaqī ki lā sharāb to de

na de sharāb Dubo kar koī kabāb to de

bujhegā soz-e-dil ai girya pal meñ aab to de

digar hai aag meñ duniyā yuuñ hī azaab to de

guzarne gar ye mire sar se itnā aab to de

ki sar pe charḳh bhī dikhlā.ī juuñ habāb to de

hazāroñ tishna jigar kis se hoeñge sairāb

ḳhudā ke vāste teġh-e-sitam ko aab to de

tumhāre matla-e-abrū pe ye kahe hai ḳhaal

ki aisā nuqta koī vaqt-e-intiḳhāb to de

dar-e-qubūl hai darbāñ na band kar dar-e-yār

duā-e-ḳhair mirī hone mustajāb to de

khule hai naaz se gulshan meñ ġhuncha-e-nargis

zarā dikhā to use chashm-e-nīm-ḳhvāb to de

balā se aap na aa.eñ pe aadmī un kā

tasallī aa ke mujhe vaqt-e-iztirāb to de

huā bagūle meñ hai kushtagān-e-zulf kī ḳhaak

ki bād-e-marg bhī mālūm pech-o-tāb to de

balā se kam na ho girye se merā soz-e-jigar

bujhā par un kī zarā ātash-e-itāb to de

shahīd kījiyo qātil abhī na kar jaldī

Thaharne mujh ko tah-e-teġh-e-iztirāb to de

shikār-e-basta-e-fitrāk ko tire maqdūr

huā na ye bhī ki bosa sar-e-rikāb to de

dil-e-birishta ko mere na chhoḌo mai-ḳhvāro

jo lazzat us meñ hai aisā mazā kabāb to de

nashe meñ hosh kise jo gine hisāb kare

jo tujh ko denā haiñ bose bilā hisāb to de

javāb-e-nāma nahīñ gar to rakh do nāma-e-yār

jo pūchheñ qabr meñ āshiq se kuchh javāb to de

rakhe hai hausla dariyā kab ahl-e-himmat kā

nahīñ ye itnā ki bhar kāsa-e-habāb to de

kahāñ bujhī hai tah-e-ḳhāk merī ātish-e-dil

kaho havā se hilā dāman-e-sahāb to de

ḳhunuk diloñ kī agar āh-e-sard dozaḳh meñ

paḌe to vāqa.ī ik baar aag daab to de

karegā qatl vo ai 'zauq' tujh ko surme se

nigah kī teġh ko hone siyāh-tāb to de

pahuñch rahūñgā sar-e-manzil-e-fanā ai 'zauq'

misāl-e-naqsh-e-qadam karne pā-turāb to de

kahan talak kahun saqi ki la sharab to de

na de sharab Dubo kar koi kabab to de

bujhega soz-e-dil ai girya pal mein aab to de

digar hai aag mein duniya yun hi azab to de

guzarne gar ye mere sar se itna aab to de

ki sar pe charKH bhi dikhlai jun habab to de

hazaron tishna jigar kis se hoenge sairab

KHuda ke waste tegh-e-sitam ko aab to de

tumhaare matla-e-abru pe ye kahe hai KHal

ki aisa nuqta koi waqt-e-intiKHab to de

dar-e-qubul hai darban na band kar dar-e-yar

dua-e-KHair meri hone mustajab to de

khule hai naz se gulshan mein ghuncha-e-nargis

zara dikha to use chashm-e-nim-KHwab to de

bala se aap na aaen pe aadmi un ka

tasalli aa ke mujhe waqt-e-iztirab to de

hua bagule mein hai kushtagan-e-zulf ki KHak

ki baad-e-marg bhi malum pech-o-tab to de

bala se kam na ho girye se mera soz-e-jigar

bujha par un ki zara aatash-e-itab to de

shahid kijiyo qatil abhi na kar jaldi

Thaharne mujh ko tah-e-tegh-e-iztirab to de

shikar-e-basta-e-fitrak ko tere maqdur

hua na ye bhi ki bosa sar-e-rikab to de

dil-e-birishta ko mere na chhoDo mai-KHwaro

jo lazzat us mein hai aisa maza kabab to de

nashe mein hosh kise jo gine hisab kare

jo tujh ko dena hain bose bila hisab to de

jawab-e-nama nahin gar to rakh do nama-e-yar

jo puchhen qabr mein aashiq se kuchh jawab to de

rakhe hai hausla dariya kab ahl-e-himmat ka

nahin ye itna ki bhar kasa-e-habab to de

kahan bujhi hai tah-e-KHak meri aatish-e-dil

kaho hawa se hila daman-e-sahab to de

KHunuk dilon ki agar aah-e-sard dozaKH mein

paDe to waqai ek bar aag dab to de

karega qatl wo ai 'zauq' tujh ko surme se

nigah ki tegh ko hone siyah-tab to de

pahunch rahunga sar-e-manzil-e-fana ai 'zauq'

misal-e-naqsh-e-qadam karne pa-turab to de