kahan wo ab lutf-e-bahami hai mohabbaton mein bahut kami hai

kahāñ vo ab lutf-e-bāhamī hai mohabbatoñ meñ bahut kamī hai

chalī hai kaisī havā ilāhī ki har tabī.at meñ barhamī hai

mirī vafā meñ hai kyā tazalzul mirī itā.at meñ kyā kamī hai

ye kyuuñ nigāheñ phirī haiñ mujh se mizāj meñ kyuuñ ye barhamī hai

vahī hai fazl-e-ḳhudā se ab tak taraqqi-e-kār-e-husn o ulfat

na vo haiñ mashq-e-sitam meñ qāsir na ḳhūn-e-dil kī yahāñ kamī hai

ajiib jalve haiñ hosh-dushman ki vahm ke bhī qadam ruke haiñ

ajiib manzar haiñ hairat-afzā nazar jahāñ thī vahīñ thamī hai

na koī takrīm-e-bāhamī hai na pyaar baaqī hai ab diloñ meñ

ye sirf tahrīr meñ Dear sir hai yā janāb-e-mukarramī hai

kahāñ ke muslim kahāñ ke hindū bhulā.ī haiñ sab ne aglī rasmeñ

aqīde sab ke haiñ tīn-terah na gyārahvīñ hai na ashTamī hai

nazar mirī aur hī taraf hai hazār rañg-e-zamāna badle

hazār bāteñ banā.e nāseh jamī hai dil meñ jo kuchh jamī hai

agarche maiñ riñd-e-mohtaram huuñ magar ise shaiḳh se na pūchho

ki un ke aage to is zamāne meñ saarī duniyā jahannamī hai

kahan wo ab lutf-e-bahami hai mohabbaton mein bahut kami hai

chali hai kaisi hawa ilahi ki har tabiat mein barhami hai

meri wafa mein hai kya tazalzul meri itaat mein kya kami hai

ye kyun nigahen phiri hain mujh se mizaj mein kyun ye barhami hai

wahi hai fazl-e-KHuda se ab tak taraqqi-e-kar-e-husn o ulfat

na wo hain mashq-e-sitam mein qasir na KHun-e-dil ki yahan kami hai

ajib jalwe hain hosh-dushman ki wahm ke bhi qadam ruke hain

ajib manzar hain hairat-afza nazar jahan thi wahin thami hai

na koi takrim-e-bahami hai na pyar baqi hai ab dilon mein

ye sirf tahrir mein Dear sir hai ya janab-e-mukarrami hai

kahan ke muslim kahan ke hindu bhulai hain sab ne agli rasmen

aqide sab ke hain tin-terah na gyarahwin hai na ashTami hai

nazar meri aur hi taraf hai hazar rang-e-zamana badle

hazar baaten banae naseh jami hai dil mein jo kuchh jami hai

agarche main rind-e-mohtaram hun magar ise shaiKH se na puchho

ki un ke aage to is zamane mein sari duniya jahannami hai