kahani ko mukammal jo kare wo bab uTha lai

kahānī ko mukammal jo kare vo baab uThā laa.ī

maiñ us kī aañkh ke sāhil se apne ḳhvāb uThā laa.ī

ḳhushī merī gavāra thī na qismat ko na duniyā ko

so maiñ kuchh ġham barā-e-ḳhātir-e-ahbāb uThā laa.ī

hamesha kī tarah sar ko jhukāyā us kī ḳhvāhish par

añdherā ḳhud liyā us ke liye mahtāb uThā laa.ī

sameTe us ke aañsū apne āñchal meñ to jaane kyuuñ

mujhe aisā lagā kuchh gauhar-e-nāyāb uThā laa.ī

mayassar thā na koī ḳhvāb in āñkhoñ meñ rakhne ko

so maiñ in ke liye ashkoñ kā ik sailāb uThā laa.ī

kahani ko mukammal jo kare wo bab uTha lai

main us ki aankh ke sahil se apne KHwab uTha lai

KHushi meri gawara thi na qismat ko na duniya ko

so main kuchh gham bara-e-KHatir-e-ahbab uTha lai

hamesha ki tarah sar ko jhukaya us ki KHwahish par

andhera KHud liya us ke liye mahtab uTha lai

sameTe us ke aansu apne aanchal mein to jaane kyun

mujhe aisa laga kuchh gauhar-e-nayab uTha lai

mayassar tha na koi KHwab in aankhon mein rakhne ko

so main in ke liye ashkon ka ek sailab uTha lai