kahin bahaar kahin Khaar-zar ki surat

kahīñ bahār kahīñ ḳhār-zār kī sūrat

jidhar bhī dekho vahī intizār kī sūrat

jise bhī dekho masā.il kī bhiiḌ meñ gum hai

har ik jabīñ hai kisī ishtihār kī sūrat

hatheliyoñ pe numāyāñ hai jabr kī tahrīr

isī ko kahte haiñ kyā iḳhtiyār kī sūrat

abhī to shām-o-sahar dil ke daaġh jalte haiñ

qabā-e-jāñ hai abhī taar taar kī sūrat

fareb-o-makr ke jalte sulagte jañgal meñ

jhulas ke masḳh huī e'tibār kī sūrat

hujūm-e-ġham meñ kisī ġham-gusār kī yādeñ

baneñ hamārī nigahbāñ hisār kī sūrat

mirā vajūd hī jab qaid se ibārat hai

nahīñ hai maut se pahle farār kī sūrat

badal ke dekheñ to 'sīmā' nizām hastī kā

kisī tarah se to nikle qarār kī sūrat

kahin bahaar kahin KHar-zar ki surat

jidhar bhi dekho wahi intizar ki surat

jise bhi dekho masail ki bhiD mein gum hai

har ek jabin hai kisi ishtihaar ki surat

hatheliyon pe numayan hai jabr ki tahrir

isi ko kahte hain kya iKHtiyar ki surat

abhi to sham-o-sahar dil ke dagh jalte hain

qaba-e-jaan hai abhi tar tar ki surat

fareb-o-makr ke jalte sulagte jangal mein

jhulas ke masKH hui e'tibar ki surat

hujum-e-gham mein kisi gham-gusar ki yaaden

banen hamari nigahban hisar ki surat

mera wajud hi jab qaid se ibarat hai

nahin hai maut se pahle farar ki surat

badal ke dekhen to 'sima' nizam hasti ka

kisi tarah se to nikle qarar ki surat