کہیں بہار کہیں پر خزاں کا موسم ہے

کہیں بہار کہیں پر خزاں کا موسم ہے

تمام شہر میں سود و زیاں کا موسم ہے

نہ راس آئے گی ہم کو ابھی یہ آب و ہوا

جہاں کے ہم ہیں نظر میں وہاں کا موسم ہے

ہوا کی ضد بھی وہی ہے دیے کی ضد بھی وہی

عجب حکایت شب زادگاں کا موسم ہے

کڑکتی بجلیاں ابر سیاہ بارش سنگ

زمیں سے کہہ دو ابھی آسماں کا موسم ہے

فضا میں عطر سی خوشبو گھلے گی اور ابھی

ابھی فسانۂ دل داد گاں کا موسم ہے

چھلک رہے ہیں سبھی درد مہرباں ہو کر

اٹھاؤ ہاتھ کہ آزار جاں کا موسم ہے

اب اس کے بعد زمیں رفتہ رفتہ ہوگی سیاہ

ابھی ہے سرخ کہ یہ کشتگاں کا موسم ہے

یقین ہے کہ نئے برگ و بار آئیں گے

یقیں کے شہر میں اب کے گماں کا موسم ہے

نگاہ شب میں شب رفتگاں گزار آئے

نگاہ صبح میں آئندگاں کا موسم ہے