kahin bhi maqam-e-sada-e-lab nahin aa saka

kahīñ bhī maqām-e-sadā-e-lab nahīñ aa sakā

maiñ tirī sadā-e-nigah pe kab nahīñ aa sakā

tire hijr tere visāl apne ḳhayāl meñ

kisī aa.ine meñ maiñ sab kā sab nahīñ aa sakā

tire qurb meñ mujhe maut yaad nahīñ rahī

vo sahar huī ki ḳhayāl-e-shab nahīñ aa sakā

jo tamām umr rahā sabab kī talāsh meñ

vo tirī nigāh meñ be-sabab nahīñ aa sakā

huī aise sāya-e-rañg meñ mirī tarbiyat

kabhī koī vasvasa-e-tarab nahīñ aa sakā

ye mirī matā-e-girāñ havā meñ bikhar ga.ī

mujhe apne soz-e-nihāñ kā Dhab nahīñ aa sakā

kahin bhi maqam-e-sada-e-lab nahin aa saka

main teri sada-e-nigah pe kab nahin aa saka

tere hijr tere visal apne KHayal mein

kisi aaine mein main sab ka sab nahin aa saka

tere qurb mein mujhe maut yaad nahin rahi

wo sahar hui ki KHayal-e-shab nahin aa saka

jo tamam umr raha sabab ki talash mein

wo teri nigah mein be-sabab nahin aa saka

hui aise saya-e-rang mein meri tarbiyat

kabhi koi waswasa-e-tarab nahin aa saka

ye meri mata-e-giran hawa mein bikhar gai

mujhe apne soz-e-nihan ka Dhab nahin aa saka