kahin ek masum nazuk si laDki mare zikr par jhenp jati to hogi

kahīñ ek ma.asūm nāzuk sī laḌkī mare zikr par jheñp jaatī to hogī

hayā-bār āñkhoñ meñ sapne sajā.e vo kuchh soch kar muskurātī to hogī

mire sher paḌh kar akele meñ aksar inheñ zer-e-lab gungunātī to hogī

mire naam phir kuchh vo likhne kī ḳhātir qalam be-irāda uThātī to hogī

hasīñ chāñdnī ho yā sāvan kī rut ho kasak us ke dil meñ jagātī to hogī

kisī ke tasavvur ko pahlū meñ pā kar vo sharmā ke ḳhud kasmasātī to hogī

mujhe pā ke bazm-e-tasavvur meñ tanhā vo palkoñ kī chilman girātī to hogī

baḌe pyaar se phir bahut hī lagan se vo ḳhvāboñ kī duniyā sajātī to hogī

vo ma.asūm tanhā pareshāñ sī laḌkī use yaad merī satātī to hogī

nigāhoñ ke bādal baraste jo hoñge vo chhup-chhup ke aañsū bahātī to hogī

kisī kī hasīñ shoḳh āñkhoñ meñ yaaro mirī yaad meñ jhilmilātī to hogī

sahelī ko tasvīr merī dikhā kar vo sharmā ke ḳhud jheñp jaatī to hogī

vo ban kar sañvar kar akele meñ aksar 'shakīl' ik qayāmat jagātī to hogī

tasavvur meñ mujh ko qarīb apne pā kar vo shīshe se nazreñ churātī to hogī

kahin ek masum nazuk si laDki mare zikr par jhenp jati to hogi

haya-bar aankhon mein sapne sajae wo kuchh soch kar muskuraati to hogi

mere sher paDh kar akele mein aksar inhen zer-e-lab gungunati to hogi

mere nam phir kuchh wo likhne ki KHatir qalam be-irada uThati to hogi

hasin chandni ho ya sawan ki rut ho kasak us ke dil mein jagati to hogi

kisi ke tasawwur ko pahlu mein pa kar wo sharma ke KHud kasmasati to hogi

mujhe pa ke bazm-e-tasawwur mein tanha wo palkon ki chilman giraati to hogi

baDe pyar se phir bahut hi lagan se wo KHwabon ki duniya sajati to hogi

wo masum tanha pareshan si laDki use yaad meri satati to hogi

nigahon ke baadal baraste jo honge wo chhup-chhup ke aansu bahati to hogi

kisi ki hasin shoKH aankhon mein yaro meri yaad mein jhilmilati to hogi

saheli ko taswir meri dikha kar wo sharma ke KHud jhenp jati to hogi

wo ban kar sanwar kar akele mein aksar 'shakil' ek qayamat jagati to hogi

tasawwur mein mujh ko qarib apne pa kar wo shishe se nazren churaati to hogi