kahin maghz uske main subh-dam teri bu-e-zulf-e-rasa gai

kahīñ maġhz us ke maiñ sub.h-dam tirī bū-e-zulf-e-rasā ga.ī

tire kūche se jo chaman talak gul uḌātī ḳhāk-e-sabā ga.ī

maraz ik jahāñ se nirālā thā mirī jaan tere marīz kā

na huā kisī se ilaaj jab ajal us kī karne davā ga.ī

ġharaz is nibāh ke sadqe meñ ġharaz aisī chaah ke sadqe meñ

na tirā hī jaur-o-jafā gayā na mirī hī mehr-o-vafā ga.ī

ye bahār hovegī sab ḳhizāñ na saman na laala na arġhavāñ

dam-e-garm kī mire dostāñ kabhū baaġh meñ jo havā ga.ī

jo fidā-e-sūrat-e-ḳhūb haiñ unheñ tab kahūñgā ki dekhiye

koī shakl apnī hī chashm meñ kabhū sair kartī jo aa ga.ī

maiñ huā ba-ḳhāk-e-siyah-faro tire kūche meñ ba-sad-ārzū

rahā sharmgīñ hī hamesha tū tirī ab talak na hayā ga.ī

sar uThā.ūñ kyūñke maiñ 'mus.hafī' nahīñ mujh meñ tāb-o-tavāñ zarī

ki ḳhirām us but-e-shoḳh kī mujhe ḳhaak hī meñ milā ga.ī

kahin maghz us ke main subh-dam teri bu-e-zulf-e-rasa gai

tere kuche se jo chaman talak gul uDati KHak-e-saba gai

maraz ek jahan se nirala tha meri jaan tere mariz ka

na hua kisi se ilaj jab ajal us ki karne dawa gai

gharaz is nibah ke sadqe mein gharaz aisi chah ke sadqe mein

na tera hi jaur-o-jafa gaya na meri hi mehr-o-wafa gai

ye bahaar howegi sab KHizan na saman na lala na arghawan

dam-e-garm ki mere dostan kabhu bagh mein jo hawa gai

jo fida-e-surat-e-KHub hain unhen tab kahunga ki dekhiye

koi shakl apni hi chashm mein kabhu sair karti jo aa gai

main hua ba-KHak-e-siyah-faro tere kuche mein ba-sad-arzu

raha sharmgin hi hamesha tu teri ab talak na haya gai

sar uThaun kyunke main 'mushafi' nahin mujh mein tab-o-tawan zari

ki KHiram us but-e-shoKH ki mujhe KHak hi mein mila gai