kahin par shadmani hai kahin par nauha-KHwani hai

kahīñ par shādmānī hai kahīñ par nauha-ḳhvānī hai

jo sach pūchho haqīqat meñ yahī to zindagānī hai

jo sūraj āsmānī hai usī se zindagānī hai

vo jab tak ġhair-fānī hai to har shai jāvedānī hai

jise tum ruuh kahte ho use dil bhī to kahte haiñ

vahī hai aatmā sab kī azal se jāvedānī hai

kisī se dushmanī terī kisī se dostī terī

kisī se be-ruḳhī hai to kisī se ḳhush-bayānī hai

nahīñ hākim ko kuchh parvā ki hai mahkūm kis ġham meñ

hai hāhā-kār harsū har taraf chhā.ī girānī hai

anokhā hai tarīqa va.az kā tere bhī ai vaa.iz

kisī se tū hai āzurda kisī par mehrbānī hai

dar-e-mahbūb se aayā hai ḳhālī nāma-bar apnā

na hai tahrīr hī meñ kuchh na paiġhām-e-zabānī hai

yahāñ faanī hai har ik shai fanā sab kā muqaddar hai

haqīqat meñ usī kī zaat 'kundan' jāvedānī hai

kahin par shadmani hai kahin par nauha-KHwani hai

jo sach puchho haqiqat mein yahi to zindagani hai

jo suraj aasmani hai usi se zindagani hai

wo jab tak ghair-fani hai to har shai jawedani hai

jise tum ruh kahte ho use dil bhi to kahte hain

wahi hai aatma sab ki azal se jawedani hai

kisi se dushmani teri kisi se dosti teri

kisi se be-ruKHi hai to kisi se KHush-bayani hai

nahin hakim ko kuchh parwa ki hai mahkum kis gham mein

hai haha-kar harsu har taraf chhai girani hai

anokha hai tariqa waz ka tere bhi ai waiz

kisi se tu hai aazurda kisi par mehrbani hai

dar-e-mahbub se aaya hai KHali nama-bar apna

na hai tahrir hi mein kuchh na paigham-e-zabani hai

yahan fani hai har ek shai fana sab ka muqaddar hai

haqiqat mein usi ki zat 'kundan' jawedani hai