kahin salib kahin karbala nazar aae

kahīñ salīb kahīñ karbalā nazar aa.e

jidhar nigāh uThe zaḳhm sā nazar aa.e

bujhī hai pyaas zamīñ kī to ye tapish kyuuñ hai

vo abr hai to barastā huā nazar aa.e

bajā hai apnī aqīdat magar savāl ye hai

vo aadmī ho to kyūñkar ḳhudā nazar aa.e

chalo ki gher leñ us ko lahū lahū chehre

har ek samt use aa.ina nazar aa.e

hamīñ ne tan se judā kar liyā hai sar apnā

bas ek ham the jo sab se judā nazar aa.e

kahāñ kahāñ abhī imkān-e-zindagī hai 'amīr'

dhuāñ chhaTe to koī rāsta nazar aa.e

kahin salib kahin karbala nazar aae

jidhar nigah uThe zaKHm sa nazar aae

bujhi hai pyas zamin ki to ye tapish kyun hai

wo abr hai to barasta hua nazar aae

baja hai apni aqidat magar sawal ye hai

wo aadmi ho to kyunkar KHuda nazar aae

chalo ki gher len us ko lahu lahu chehre

har ek samt use aaina nazar aae

hamin ne tan se juda kar liya hai sar apna

bas ek hum the jo sab se juda nazar aae

kahan kahan abhi imkan-e-zindagi hai 'amir'

dhuan chhaTe to koi rasta nazar aae